संक्रमित विरामीको उपचारमा ध्यान देउँ

झापामा कोरोनाको दोस्रो भेरियन्टको संक्रमण तिव्र गतिमा बढिरहेको छ । जिल्लामा संक्रमणको दर बढेसँगै संक्रमितको उपचारमा जटिलता आउन थालेको छ । सबै अस्पतालले संक्रमित राखेर उपचार नर्गन सक्छ । अस्पतालहरुमा अक्सिजनको सिलिण्डर, भेन्टिलेटर, लगायतका आवश्यक पर्ने स्वास्थ्य सामाग्री उपलब्ध नहुन सक्छ । त्यसैले बेलैमा सरकारी तथा निजी अस्पालहरुले यसको व्यवस्था गर्न जरुरी छ । यहाँका संक्रमित जिल्लामा उपचार पाउन नसकेर अन्यत्र गईरहेका छन् । बाहिर महङ्गोे उपचार गर्न विरामी बाध्य छन् । बाहिरबाट पनि महङ्गो खर्च गरेर उपचार गर्न यहाँ आएका छन् । हुनेखानेले जहाज चाटर गरेर संक्रमितको उपचार गराउँला, विरामी बाचे पनि नबाचे पनि उपचारमा खर्च गर्छन् नै । तर एउटा निम्नस्तरको व्यक्तिले त्यो प्रकारको उपचार गर्न सक्दैन । खर्च अभावमा उपचारै नपाएर मर्ने अवस्था विरामीमा नआसोस् ।

संक्रमित विरामीको उपचारमा चाहिने सबै प्रकारको स्वास्थ्य सेवा दिन सरकारले बेलैमा ध्यान दिनुपर्छ । दोस्रो लहरको कोरोनाका विरामी जिल्लामा उपचार नपाएर विराटनगर र धरानका सरकारी तथा निजी अस्पताल गईरहेका छन् । त्यहाँ पनि राम्रो उपचार हुन नसकेर झापाका धेरै विरामीले ज्यान गुमाईसकेका छन् । संक्रमितका लागि झापामा सामान्य खालको तयारी गरिँदैछ । त्यसले मात्र पुग्दैन । स्थानीय सरकारले आफ्ना नागरिकको सुरक्षाका लागि सबै प्रकारको स्वास्थ्य मापदण्ड अपनाउनु पर्छ । छिमेकी मुलुक भारत र विदेशबाट आएका नेपाली नागरिकहरुलाई राख्नका लागि होल्डिङ सेन्टर, क्वारेन्टाइन, अस्पतालमा कोरोना सम्बनधीका विशेषज्ञ डाक्टर, नर्स, एम्बुलेन्स, अक्सिजन सहितको भेन्टिलेटर, वेड, कर्मचारी, लगायतका स्वास्थ्य सामाग्रीको जोहो गर्न ढिला नगरौँ । अहिले झापाका धेरै संक्रमितहरु अस्पताल गएका छैनन् । घरघरमा सामान्य उपचार गरेर बसिरहेका छन् ।

जटिल समस्या भएका विरामी मात्र अस्पताल पुग्ने गरेका छन्। श्वास प्रश्वासमा समस्या आएका विरामी अक्सिजन सहितको भेन्टिलेटर भएको राम्रो अस्पतालमा उपचारमा गएका छन् । सामान्य रुघाघोकी, ज्वरो, जिउदुख्ने, टाउको दुख्ने विरामी घरैमा तातोपानी, साईनेक्स र पारासिटामोल खाएर बसेका छन् । सामान्य संक्रमणको लक्षण देखाएकाहरु डाक्टरहरुको सल्लाह अनुसार होम आइसोलेसनमा सुरक्षीत भएर स्वास्थ्य मापदण्ड अपनाईरहेका छन् । त्यस्ता विरामी मेचीनगरसहित झापाका विभिन्न पालिकाका छन् । ती विरामीहरुको अवस्था जतिखेर जे पनि हुन सक्छ । उनीहरुको अक्सिजनको मात्र घट्न सक्छ । त्यतिखेर अकिस्जनसहितको सिलिण्डर घरैमा पुर्याउनु पर्ने अवस्था नआउला भन्न सकिन्न । त्यसका लागि सरकारले बेलैमा तयारी गनुपर्छ । संघीय, प्रदेश र स्थानीय सरकारले उनीहरुको बस्ने, खाने र सम्पूर्ण उपचार खर्च निःशुल्क गरिदिनु पर्छ । गतवर्ष यिनै कारणहरुले गर्दा नागरिक अकालमानै ज्यान गुमाउन बाध्य भएका थिए । अब विगतको पाठ सिकेर भएपनि स्थानीय सरकारले आफ्ना नागरिकको ज्यान जोगाउन उपचारमा कुनै कमी आउन दिनु हुँदैन । यसका लागि सरकारले अन्य शिर्षकका वजेट घटाएर भएपनि कोभिड–१९ को संक्रमण रोकथामका लागि आवश्यक वजेट छुटाउन कन्जुसाई नगरौँ ।