मेचीनगर, १७ फागुन । एमसीसी पास गराउन भूमिका खेलेको भन्दै आफ्नै पार्टी र शीर्ष नेतासँग असन्तुष्ट जनता समाजबादी पार्टी (जसपा)का झापा जिल्ला सचिव पुष्प पौडेलले पार्टी त्यागेका छन् ।
सत्ता गठबन्धनमा सामेल जसपा समेतको समर्थनमा प्रतिनिधिसभाबाट अमेरिकी सहयोग परियोजना एमसीसीको सम्झौता आइतवार राति पास भएको थियो ।
एमसीसी पास भएको भोलिपल्ट सोमवार सामाजिक सञ्जाल फेसबुकमा स्टाटस लेख्दै पौडेलले पार्टीको साधारण सदस्यता समेत परित्याग गरेको घोषणा गरे ।
उनले एमसीसी राष्ट्रघाती भएको टिप्पणी गर्दै आफुले अति सम्मान गरेका पूर्व प्रधानमन्त्री डा. बाबुराम भट्टराईले सो सम्झौता पास गराउन कुकृत्य गरेको आरोप लगाएका छन् ।
अबोप्रान्त स्वतन्त्र सामाजिक भूमिकामा रहने प्रतिबद्धता व्यक्त गरेका उनले डा. भट्टराईलाई देशको आदर्श मानेर विगतमा नयाँ शक्ति पार्टी स्थापना हुँदादेखि नै साथमा रहेर काम गरेकोमा आत्मालोचना गरेका छन् ।
बिगतमा पार्टीमा रहँदा भए गरेका सांगठनिक गतिविधिबाट देश र समाजमा पर्न गएको क्षतिप्रति उनले क्षमा मागेका छन् ।
मेचीनगर–६ काँकरभिट्टा निवासी पौडेल नयाँ शक्ति पार्टीको मूल संस्थापक सदस्य, जसपाको स्थापनाकालदेखि हालसम्म जिल्ला सचिव र जसपाकै क्षेत्र नं. १ को इञ्चार्ज रहेका थिए ।
उनी काँकरभिट्टास्थित मेची मोडल एकाडेमीको प्रिन्सिपल समेत हुन् ।
Discussion about this post