मेचीनगर, २५ साउन । सरकारले विद्यार्थी वर्गका लागि निर्धारण गरेको भाडा दररेटमा ४५ प्रतिशतले हुने छुट दिने लगायतका विषयमा यातायात व्यवसायी र विद्यार्थीबीच सहमति भएको छ ।
पूर्व मेची बस व्यवसायी प्रालिको सभाकक्षमा आज विद्यार्थी नेता र व्यवसायीबीच यस्तो सहमति भएको हो ।
लामो समयदेखि बस चढ्ने विषयमा विद्यार्थीले समस्या भोग्दै आएका थिए । अब दुईपक्षबीचको छलफलबाट विद्यार्थीको समस्या समाधान भएको छ ।
यस्तै स्कुल र कलेजको पोसाक र क्याम्पसले जारी गरेको विद्यार्थी परिचय पत्रको आधारमा सार्वजनिक विदाका दिन वाहेक छुट उपलब्ध गराइने निर्णय भएको छ । अधिकतम् एक बसमा २० जना विद्यार्थी यात्रा गर्न पाउने गरी सहमति भएको हो ।
पूर्व मेची बस व्यवासायी प्रालिका अध्यक्ष विष्णुकुमार श्रेष्ठको अध्यक्षतामा भएको छलफलमा व्यवसायी राजेन्द्र रिजाल, देविप्रसाद भट्टराई, हिमा दाहाल, केशव गिरी, प्रविन थापा, कपिल थापा, किरण खड्का लगायतको सहभागिता रहेको थियो ।
यस्तै, विद्यार्थीको तर्फबाट काँकरभिट्टा क्याम्पसका स्ववियु सभापति विशाल तामाङ, अर्जुन गौतम, सन्दिप न्यौपाने, मनिष विश्वकर्मा, श्रीजीत ढुंगाना लगायतको उपस्थिति रहेको थियो ।
धुलाबारी, ईट्टाभटा, काँकरभिट्टा, चारआली, बिर्तामोड र भद्रपुरसम्मका कलेजमा पढ्ने विद्यार्थी बसबाट आउँजाउँ गछन् ।
Discussion about this post