झापा, २७ साउन । कोशी प्रदेशस्तरिय अन्तर विद्युत वितरण केन्द्र नक–आउट फुटबल प्रतियोगिताको उपाधि धुलाबारी वितरण केन्द्र झापाले जितेको छ ।
शनिबार सम्पन्न फाइनल खेलमा मोरङको रंगेली विद्युत वितरण केन्द्रलाई १–० गोल अन्तरले पराजित गर्दै आयोजक धुलाबारी वितरण केन्द्रले उपाधि जितेको हो ।
नेपाल विद्युत प्राधिकरणको ३८ औं वार्षिकोत्सवको अवसरमा आयोजित प्रदेशस्तरिय फुटबल प्रतियोगिताको उपाधि धुलाबारीलाई जिताउन विशाल गौतमले गरेको एक गोल नै निर्णायक बन्यो ।
पहिलो हापमा दुबै टिमले गोलरहित बराबरी खेलेका थिए । प्रतिष्पर्धात्मक भएको खेलको दोस्रो हापमा सम्हालिन नसक्दा रंगेली उपविजेतामा चित्त बुझाउन पुग्यो ।
खरबन्दी फुटबल मैदान सालबारीमा आयोजित प्रतियोगितामा कोशी प्रदेश अन्तर्गतका ६ वटा विद्युत वितरण केन्द्रका टिम सहभागी थिए । प्रतियोगितामा रंगेलीका चन्द्रकान्त चौधरी हाइस्कोर र शरण कुमार मलाहा फाइनल खेलको म्यान अफ द म्याच घोषित भए ।
त्यस्तै विजेता धुलाबारीका विशाल गौतम म्यान अफ द सिरिज र अनिल लामिछाने बेष्ट गोलकिपर घोषित भए ।
प्रतियोगिताको विजेता, उपविजेता टिमसंगै व्यक्तिगत विधामा पुरस्कार जित्ने खेलाडीहरुलाई कार्यक्रमका प्रमुख अतिथि नेपाल विद्युत प्राधिकरण कोशी प्रादेशिक कार्यालय प्रमुख उमेशकुमार झा, धुलाबारी वितरण केन्द्र प्रमुख शुनिलकुमार महतो, झापा जिल्ला फुटबल संघका अध्यक्ष भगिरथ आले (मामा) लगायत कोशी प्रदेश अन्तर्गतका विभिन्न वितरण केन्द्र प्रमुखहरुले ट्रफि, मेडल र प्रमाण पत्र लगायतका पुरस्कार वितरण गरेको प्रतियोगिता आयोजक समिति संयोजक विश्वेश्वर खड्काले बताए ।
Discussion about this post