‘समावेशी’ विषय कार्यान्वयनमा नआउनु दुःखद

मेचीनगर, २५ फागुन । पत्रकार तारामणि सापकोटाद्वारा लिखित आमसञ्चार र समावेशी पत्रकारिता पुस्तकका बारेमा चर्चा गर्दै वक्ताहरुले लोकतन्त्रमा ‘समावेशी’ विषयलाई कार्यान्वयनमा नल्याएकोमा चिन्ता व्यक्त गरेका छन् ।

आज इटाभट्टामा प्रेस क्लब मेचीनगरले आयोजना गरेको आमसञ्चार र समावेशी पत्रकारिता पुस्तकको चर्चा गर्दै समीक्षकहरु पत्रकार सन्तोष आचार्य, प्राध्यापक मणिकुमार लिम्बु र शिक्षिका रुमा राजबंशी लगायत वक्ताहरुले उक्त धाराणा राखेका हुन् ।

‘संविधानमा समावेशी शब्द मात्र होइन’, प्राध्यापक लिम्बुले भने–‘समतामुलक नेपाल प्रस्तावना गरिएको छ । राज्यमा समावेशी भएन ।

जस्तो उदाहरणका लागि बगैचाँमा धेरै फुल भए सुन्दर देखिन्थ्यो । तर राज्यमा एउटा फुलले मात्र शासन गरिरहेको छ । जस्ले गर्दा समावेशी समाज निर्माण भएन ।’

पुस्तकमा इतिहासदेखि वर्तमान सम्मका तथ्यपरक घटनाहरु समावेश गरिएको उनको भनाई छ । पत्रकार आचार्यले पुस्तकलाई तीन भागमा राखेर चित्रण गरेका थिए । उनले पैसा, परिवार र कृति : कृतिलाई घाटपछिको जिन्दगीको रुपमा व्यख्या गरेका छन् । लेखक सापकोटाको पुस्तकलाई कृति अर्थात घाटपछिको जिन्दगीको संज्ञा उनले दिएका छन् ।

शिक्षक राजबंशीले पुस्तकका विभिन्न बुँदाहरुको विषयमा दस्तावेजका रुपमा व्यख्या गरेकी छन् । लेखक तारामणि सापकोटाले संविधानको धारा २८३ मा समावेशी शब्द लेखिएपनि कार्यान्वयन नहुँदा लोकतन्त्रमा समस्या आउने दावी गरे ।

उनका अनुसार लोकतन्त्रमा सबै जातजाति र समुदायको उत्तिकै महत्व र संस्कार हुन्छ, तर, अहिलेसम्म निश्चित एउटा वर्ग वा समुदायले मात्र राज्य कब्जा गरिरहेको छ । समावेशी र त्यसमा प्रतिनिधित्व गर्ने विषयमा समस्या रहेकोले त्यसमा वहस आवश्यक रहेको उनको
ठहर छ ।

कार्यक्रममा लेखक निरोज कट्टेल, शिक्षक दामोदर ढुंगेल, पत्रकारहरु मोहन काजी, राजेन्द्र गौतम, पर्वत पोतेल, शिशिर चौंलागाई, नवराज सुवेदी, लगायतले विभिन्न जिज्ञासा र सुझाव राखेका थिए ।

प्रेस क्लब मेचीनगरका अध्यक्ष डम्बर बरालको अध्यक्षतामा भएको कार्यक्रमको स्वागत उपाध्यक्ष जिआर धितालले र सञ्चालन सचिव देबु बानियाँले गरेका थिए ।