ज्यामिरगढी, २२ बैशाख । मेचीनगरमा उत्पादन गरिएको ‘खरबुजा’ अब भाटभटेनी र ठुला तथा साना होटलहरुमा ‘सलाद’को रुपमा पाइन थालेको छ ।
मेचीनगर–१५ स्थित कालिका र जरीबुटीमा रहेको नेपाली बाबु स्मार्ट कृषि फार्मले उत्पादन गरेको ‘खरबुजा’ भाटभटेनी, ठुला तथा साना होटल र पसलहरुमा उपलब्ध हुन थालेको छ ।
फार्मका सञ्चालक लीला खनालले दैनिक २२ देखि २५ टन खरबुजा बजार गइरहेको बताए । उनले झापाको बिर्तामोड, दमक र विराटनगरमा रहेको भाटभटेनीमा यहाँका खरबुजाहरु बिक्रीमा राखिएको जानकारी दिए ।
त्यस्तै बिर्तामोडको सिद्धार्थ होटल तथा धुलाबारी र काँकरभिट्टाका होटलहरुमा समेत ‘सलाद’का रुपमा यहाँको खरबुजा पठाइरहेको उनको भनाई छ । उनका अनुसार होटलमा ग्राहकलाई काँक्रा, मुलासँगै मिसाएर खान दिएको खरबुजा हाम्रै फार्मको ब्राण्ड रहेको छ ।
झापाका र मेचीनगरका केहि ठुला तथा साना होटलहरुमा ‘सलाद’का रुपमा प्रयोग भएको खरबुजा यहिँबाट गइरहेको खनालले बताए । गर्मी बढेसँगै खरबुजाको माग पनि बजारमा बढ्न थालेको छ ।
‘दुई कुँइन्टल भन्दा बढी खरबुजा लानेलाई प्रति केजी २५ रुपैयाँ लिने गरिएको छ’, खनालले भने–‘त्यो भन्दा कम्ती लगे प्रति केजी ४० रुपैयाँ पर्नेछ । भारतबाट आएको विषादी हालेको र सस्तो खरबुजा जस्तो होइन । यहाँको खरबुजा खाँदा फेलेवर आउँछ । यहाँको खरबुजा महंगो जस्तो देखिए पनि गुणस्तरीय रहेको छ ।’
फार्मको ४२ विगाह जग्गा मध्ये १३ विगाहमा खरबुजा खेती लगाइएको छ । त्यसो त खरबुजा बाहेक बाँकी जग्गामा तरकारी खेती समेत लगाइएको छ । यसअघि ११ विगाह जग्गामा लगाइएको आलु खेतीबाट फार्मलाई मनग्ये आम्दानी भएको थियो । आलु प्रति केजी २९ देखि ५५ रुपैयाँ सम्म रहेको छ ।
४ वर्षदेखि फार्मले खेती गर्न सुरु गरे पनि ७ महिना यता व्यापार बढाउँदै लगिएको अर्का सञ्चालक रामहरि नेपालले बताए । रामहरि र हरि नेपालले उक्त फार्ममा फलफुल र तरकारी खेती गर्दै आएका थिए । ७ महिना यता उक्त फार्ममा खनाल पनि जोडिएका छन् ।
स्थानीय कालिका मावि र अन्य जग्गावालाहरुसँग २५ वर्षका लागि उक्त जग्गा लिजमा लिएका हुन् । बार्षिक २ लाख रुपैयाँ तिर्ने गरी उक्त जग्गा लिएको सञ्चालकहरुको भनाई छ ।
त्यस्तै ७ विगाह जग्गामा टमाटर खेती रहेको छ । प्रति केजी २६ रुपैयाँ रहेको टमाटर सकिएको बताइएको छ । फार्ममा भिण्डी र करेला प्रति केजी ८०, काँक्रा प्रति केजी ४० रुपैयाँ रहेको नेपालले बताए ।
फार्ममा बैगुन, फर्सी, खोर्सानी लगायतका तरकारीहरु उत्पादन गरिएको छ । भारतीय तरकारीले गर्दा नेपाली उत्पादन मारमा परेको उनीहरुको भनाई छ । भारतबाट आएको सस्तो र विषादी तरकारीले नेपाली बजार त सक्यो, स्वास्थ्यमा समेत खेलवाड भएको खनालको आरोप छ ।
फोटो÷शब्द : अर्जुन कार्की
Discussion about this post