मेचीनगर, २० फागुन । काँकरभिट्टा बहुमुखी क्याम्पसमा रहेको स्वतन्त्र विद्यार्थी युनियन (स्ववियू) निर्वाचनमा विद्यार्थीका पाँच वटा संघ, संगठनहरुले नाम दर्ता गराएका छन् ।
आगामी चैत ५ गते हुने स्ववियू निर्वाचनका लागि आज एमाले निकट विद्यार्थी संगठन अखिल नेपाल राष्ट्रिय स्वतन्त्र यूनियन, नेपाली काँग्रेस निकट नेपाल विद्यार्थी संघ, राष्ट्रिय प्रजातन्त्र पार्टीको विद्यार्थी संगठन राष्ट्रिय प्रजातान्त्रिक विद्यार्थी संगठन, नेकपा माओवादी केन्द्र निकट अखिल नेपाल राष्ट्रिय स्वतन्त्र यूनियन (क्रान्तिकारी) र नेपाल कम्यूनिष्ट पार्टी (एकीकृत समाजवादी) निकट अखिल नेपाल राष्ट्रिय स्वतन्त्र यूनियन (एस)ले नाम दर्ता गराएका हुन् ।
काँकरभिट्टा बहुमुखी क्याम्पस निर्वाचन समितिका सदस्य दुर्गाबहादुर लुइटेलले विद्यार्थीका पाँच वटा संघ–संगठनले आज नाम दर्ता गराएको जानकारी दिए ।
२०७९ चैत १० गते दोस्रो पटक सम्पन्न निर्वाचनमा नेवि संघका विशाल तामाङ सभापतिमा विजयी भएका थिए । २०७३ फागुन १८ मा पहिलो पटक भएको स्ववियू निर्वाचनमा नेवि संघका सुरज सुवेदीको प्यानलले निर्वाचन जितेको थियो ।
क्याम्पसले निर्वाचन तालिका समेत सार्वजनिक गरेको छ ।
निर्वाचन समिति सदस्य लुइटेलका अनुसार फागुन २१ गते दर्ता भएका संघ–संगठनको सूची प्रकाशन गरिने, फागुन २५ गते प्रथम मतदाता सूची प्रकाशन गरिने, फागुन २६ गते विहान ८ बजेसम्म् मतदाता सूची उपर दावी विरोध, ९ बजे मतदाता सूची उपर दावी विरोधको छानबिन गरी अन्तिम मतदाता नामावली प्रकाशन गरिने छ ।
अनेरास्ववियू यसअघिको दुई पटकको चुनावमा पराजय भोगेको बदला लिने योजनामा छ । नेवि संघ यसअघिको शाख जोगाउने ध्यानमा छ । यसपटक चुनावी प्रतिस्पर्धा कडा हुने विद्यार्थिहरुको अनुमान छ । अनेरास्ववियूले यसपटक गठबन्धन गरेरै भएपनि सत्ता आफ्नो हातमा लिने उदेश्य राखेका छ ।
क्याम्पसमा हाल करिव ६०० सय विद्यार्थी अध्ययनरत छन् ।
Discussion about this post