मेयरले किसानलाई भने–‘तालिम लिएर दक्ष बन्नु होस्’

मेचीनगर, १० जेठ । मेचीनगर नगरपालिकाका प्रमुख गोपालचन्द्र बुढाथोकीले सुपारी खेती उत्पादन हुने क्षेत्रका किसानलाई सीप दिएर दक्ष बनाउन सक्दो सहयोग गर्ने बताएका छन् ।

आज मेचीनगर–९ स्थित थोप्लेविरान सामुदायिक भवनको सभाहलमा तालिम लिइरहेका सुपारी खेती गर्ने किसानहरुलाई उनले यस्तो कुरा बताएका हुन् ।

नगरपालिकाको कृषि शाखाले मेचीनगर–१, ९ र १२ नम्बर वडाका किसानलाई सुपारी खेती सम्बन्धी तालिम दिइरहेको छ ।
नगरप्रमुख बुढाथोकीले सुपारी खेतीमा आवद्व इच्छुक किसानलाई तालिम लिएर दक्ष बन्न आग्रह गरेका छन् ।

सुपारीको पकेट क्षेत्र रहेको नगरका केहि वडाबाट सीप सिकेर मेचीनगर–९ नम्बर वडाको माटो पनि परीक्षण गरेर सुपारी खेतीको प्रर्वद्धनमा किसान जुटे नगरपालिकाले सहयोग गर्ने उनले बताए ।

वडाका सहभागी ४० जना किसानलाई भारत सिलीगुढीबाट आएका कृषि विज्ञ डा.शरणकुमार रिजालले प्रशिक्षण दिइरहेका छन् । तालिम आइतबारसम्म सञ्चालन हुनेछ । तालिममा सहभागीहरुलाई सुपारी बारीमा नै लगेर स्थलगत अवलोकन गराइएको आर्थिक विकास शाखा प्रमुख दिपेन्द्र कार्कीले बताए ।

शनिबारको उद्घाटन कार्यक्रममा वडाध्यक्ष कञ्चनकुमार तामाङ लगायतले सुपारी खेतीको प्रर्वद्धनमा किसानहरु एकजुट भएर लाग्नु पर्ने बताए ।

प्रशिक्षक कृषि विज्ञ डा.रिजालले यसअघि मेचनगर–१ र १२ नम्बर वडाका किसानलाई सुपारी खेती सम्बन्धी तालिम दिएका थिए ।
नगरपालिकाको कृषि शाखाले आयोजना गरेको तालिमहरुको सहजीकरण कृषि प्राविधिक नम्रता राईले गरिरहेकी छन् ।