मेचीनगर, ३ भदौ । मेचीनगर नगरपालिकाले तरकारीको प्रस्तावित समर्थन मूल्य, संकलन केन्द्र र बिक्री कक्षका विषयमा किसानहरुसँग छलफल गरेको छ ।
मेची ताजा तरकारी मिश्रित कृषक समूह मेचीनगर–२ ले बौद्वमोडमा वर्तमान कृषिका समस्या र समाधानका विषयमा आयोजना गरेको अन्तरक्रिया कार्यक्रममा नगरपालिकाले प्रस्ताव गरेको समर्थन मुल्य, संकलन केन्द्र र बिक्री कक्षका बारेमा सुझावहरु लिने काम भएको छ ।
कार्यक्रमका प्रमुख अतिथि मेचीनगर नगरपालिकाका नगरप्रमुख गोपालचन्द्र बुढाथोकीले शुद्व अर्गानिक तरकारी खेती अभियानलाई सार्थकता दिन किसानहरुले योजना बनाएर ल्याए पूर्णरुपमा सहयोग रहने बताए ।
‘विषादीको प्रयोग भन्दा पनि जैविक, जीवाणु मलमा बढी ध्यान दिन आवश्यक छ’, नगरप्रमुख बुढाथोकीले–‘किसानकै सहयोगका लागि मेचीनगरमा समर्थन मुल्य, संकलन केन्द्र र बिक्री कक्षको अवधारणा ल्याइएको हो । त्यसका लागि सबै किसानहरुको सहकार्य जरुरी छ ।’
मेची ताजा तरकारी मिश्रित कृषक समूहका अध्यक्ष केदारनाथ चापागाईको अध्यक्षतामा सम्पन्न कार्यक्रममा २ नम्बर वडाका वडाध्यक्ष दिपक बराल, अगुवा किसानहरु दिलमान राई, पूर्णबहादुर खड्का, कृषि अभियन्ता डिल्ली खतिवडा, निलकण्ठ तिवारी लगायतले नगरपालिकाले ल्याएको योजना राम्रो रहेको बताएका थिए । उनीहरुले यसलाई कहिले, कसरी लागू गर्ने त्यसमा हाम्रो पूर्ण साथ र सहयोग रहने बताए ।
नगरपालिकाले वडा नम्बर २, ३ र ७ लाई कृष जोनका रुपमा तराकारी पकेट क्षेत्र घोषणा गरेको छ । त्यहाँ किसानहरुलाई विभिन्न तालिमहरु दिँदै आएको छ । किसानहरुले उत्पादन गरेका तरकारीलाई उचीत मूल्य तोक्ने, संकलन गर्ने र बिक्रीका लागि नगरपालिकाले सहयोग गर्ने लक्ष्य लिएको छ ।
नगरपालिकाका आर्थिक विकास शाखा प्रमुख दिपेन्द्र कार्की, कृषि शाखा प्रमुख टेकेन्द्र प्रधानले प्रोजेक्टर मार्फत किसानलाई तरकारीमा आत्मनिर्भर बनाउने विषयमा जानकारी गराएका थिए ।
सोही अवसरमा स्थानीय सामाजसेवी ज्ञानबहादुर तामाङलाई सम्मान समेत गरिएको थियो । कार्यक्रमको सहजीकरण समूहका सचिव पुस्कर घिमिरेले गरेका थिए ।
Discussion about this post