´एमआरपी`ले गर्दा ग्राहकलाई भार बढ्छ : उपाध्यक्ष श्रेष्ठ

धुलाबारी, १० जेठ । नेपाल उद्योग बाणिज्य महासंघका उपाध्यक्ष दिल सुन्दर श्रेष्ठले नेपाल जस्ताे कम विकसित देशमा व्यापारीलाई भन्सारमा एमआरपी लगाउनु जायज नभएकाे बताएका छन् ।

आइतबार मेची उद्योग बाणिज्य संघले धुलाबारी स्थित कृष्ण पार्टी प्यालेसमा आयोजना गरेको पद हस्तान्तरण तथा शपथ ग्रहण कार्यक्रमकाे उद्घाटन गर्दै प्रमुख अतिथि उपाध्यक्ष श्रेष्ठले यस्ताे कुरा बताएका हुन् ।

´चाइना र भारतमा समेत एमआरपी लागू भएको छैन्`, श्रेष्ठले भने-´विकसित देश हुँदै गरेकाे कम विकसित देश नेपालमा व्यापारीलाई याे नियम लगाउनु उचित हाेइन ।`

उनले भने-´एमआरपी लगाउँदा जनताले झन दु:ख पाउँछन् ।उदाहरणका लागि अहिल १५ सय पर्ने जुत्ता अब ३ हजार पर्छ ।` उद्योगी-व्यापारीलाई विभिन्न बाहाना दु:ख दिइरहेकाे बताउँदै उपाध्यक्ष श्रेष्ठले भ्याट, अन्यकर लगायतमा पनि सरकारले अंकुश लगाइरहेकाे बताए ।

कार्यक्रममा मेचीनगर नगरपालिकाकी उपप्रमुख मीना पाेखरेल उप्रेतीले व्यापारीसँगकाे सम्बन्ध नङ र मासुकाे जस्ताे हुनु पर्ने बताइन् । उनले कर बढाउने भन्दा पनि करकाे दायरा फराकिलाे पार्नेमा जाेड दिएकी थिइन् ।

प्रमुख प्रशासकीय अधिकृत अग्निप्रसाद अधिकारीले बाणिज्य संघ सरकारी अंग जस्तै भएर हातेमालाे गरिरहेकाे बताए ।

मेची भन्सार कार्यालयका प्रमुख शिवलाल न्याैपानेले सरकारले भर्खरै लगाएकाे एमआरपीलाई सबै व्यापारीले अनुमति लिएर काम गर्न अनुराेध गरेका थिए । उनले पूर्वी प्रवेशद्वार गेटमा नेपालमा स्वागत छ भन्ने बाेर्ड लगाइदिन समेत संघलाई आग्रह गरेका थिए ।

यस्तै, नेपाल उद्योग बाणिज्य महासंघका केन्द्रीय सदस्य रमेश रसाइली, दमक उद्योग बाणिज्य संघका अध्यक्ष गाेपाल गुरागाई लगायतले केन्द्रदेखि नगर, जिल्लाका नवनिर्वाचित टिमले व्यापारीकाे हितमा काम गर्ने बताएका थिए ।

मेची उद्योग बाणिज्य संघका नवनिर्वाचित अध्यक्ष खेमराज प्रसाईले स्वीकारवक्ति मन्तव्य व्यक्त गरेका थिए । उनले बजारका सडक बत्ती, रात्रीकालिन व्यापार र काँकरभिट्टामा संघकाे शाखा राख्ने प्रतिवद्वता गरे ।

प्रमुख निर्वाचन अधिकृत अधिवक्ता पदम डाँगीले नवनिर्वाचित कार्यसमितिकाे नाम घाेषणाा गरेका थिए । नवनिर्वाचित कार्यसमितिलाई  नेपाल उद्योग बाणिज्य महासंघ काेशी प्रदेश उपाध्यक्ष एवम् मेची उद्योग बाणिज्य संघका निवर्तमान अध्यक्ष ऋषिराज तिम्सिनाले शपथ गराएका थिए ।

शपथ ग्रहण कार्यक्रमकाे सहजीकरण निर्वाचन अधिकृत अधिवक्ता अजय घिमिरे र संघका कार्यकारी निर्देशक गाेपाल वस्नेतले गरेका थिए ।

संघकाे गत वैशाख २६ गते सम्पन्न अधिवेशनले अध्यक्ष पदमा खेमराज प्रसाई, वरिष्ठ उपाध्यक्षमा आनन्द खड्का, उद्योग उपाध्यक्षमा हरि कोइराला, बाणिज्य उपाध्यक्षमा सन्तोष खवास, महिला उपाध्यक्षमा उषा नेपाली श्रेष्ठ र महासचिवमा ध्रुब कनाल निर्वाचित भएका थिए ।

यसैगरी महिला सदस्य पदमा कृष्णकुमारी प्रसाईं (कल्पना) र चम्पा नेम्बाङ विजयी भएका थिए । यस्तै पुरूष सदस्य तर्फ दिनेश पोखरेल, सचिन निरौला, खिरोज बराल (फिरोज), जयकुमार श्राप (सुनार), अर्जुन तिवारी, आशिष संग्रौला, तारा श्रेष्ठ र राजेशकुमार बंशल विजयी भएका थिए ।

मेची उद्योग बाणिज्य संघका अध्यक्ष खेमराज प्रसाईले अध्यक्षता गरेकाे कार्यक्रमकाे स्वागत निर्वमान बरिस्ठ उपाध्यक्ष कपिल क्षेत्री (किशाेर)ले गरेका थिए ।

सञ्चालन निवर्तमान महासचिव दिनेश शाक्य र नवनिर्वाचित महासचिव ध्रुब कनालले संयुक्त रूपमा गरेका थिए । धन्यवादसहित कार्यक्रमकाे समापन महिला उपाध्यक्ष उषा श्रेष्ठले गरेकी थिइन् ।