मेचीनगर, ४ माघ । ट्राफिक प्रहरी पोष्ट काँकरभिट्टा भवन निर्माण समितिले भवन बनाउन सहयोग गर्ने १०२ जना दाताहरुलाई सम्मान गरेको छ ।
आज काँकरभिट्टा खानेपानी सभा हलमा ट्राफिक प्रहरी पोष्ट काँकरभिट्टा भवन निर्माण समितिले नवनिर्मित भवन निर्माणमा सहयोग पुर्याउने दाताहरुलाई सम्मान गरेको हो ।
कार्यक्रममा संविधान सभा सदस्य रविन कोइरालाको प्रमुख आतिथ्यता रहेको थियो । कार्यक्रममा प्रमुख अतिथि कोइराला, प्रदेश ट्राफिक प्रहरी प्रमुख एसपी सरोज पौडेल, मेचीनगर नगरपालिकाकी उपमेयर मीना पोखरेल उप्रेती, नेपाली कांग्रेसका झापा उपसभापति केशवराज पाण्डे, नेकपा माओवादी केन्द्र मेचीनगरका इन्चार्ज माधव अर्याल लगायतले शुभकामना मन्तव्य राखेका थिए ।
भवन निर्माण समितिका कोषाध्यक्ष एवम् आर्थिक संयोजक सुभास गुरुङले भवन बनाउन २२ लाख ६५ हजार १४५ रुपैयाँ दाताहरुबाट नगद तथा जिन्सी सहयोग भएको जानकारी दिए ।
उनका अनुसार दाताहरुबाट १६ लाख ११ हजार ४७८ रुपैयाँ नगद र ६ लाख ५३ हजार ६६७ रुपैयाँ
बराबरको जिन्सी सामान उपलब्ध भएको छ ।
उनले २ लाख ४२ हजार ३१२ रुपैयाँ उठन बाँकी, १६ हजार १९३ रुपैयाँ बैँकमा बचत छ भने २ लाख ८३ हजार तिर्न बाँकी रहेको बताए ।
स्थानीय राजनीतिक दल, उद्यागी–व्यवसायी तथा समाजसेवीहरुको वृहत छलफलबाट मेची सामुदायिक सेवा केन्द्रका अध्यक्ष मुक्ति पौडेलको अगुवाईमा ट्राफिक प्रहरी पोष्ट काँकरभिट्टाको भवन निर्माण समिति बनिएको थियो ।
उक्त नवनिर्मित भवन मेची भन्सार कार्यालयको जग्गामा बनाइएको छ । भवन यहि माघ ७ गते ट्राफिक प्रहरी पोष्ट काँकरभिट्टालाई हस्तान्तरण गर्ने कार्यक्रम रहेको छ ।
मेचीनगर–६ स्थित पुरानो भन्सारमा निर्माण भएको उक्त भवनको चार वटा कोठामा ब्यारेक, आवाससहितको इन्चार्ज कक्ष, कार्यालय, चमेना गृह रहेको छ ।
ट्राफिक प्रहरी पोष्ट काँकरभिट्टा भवन निर्माण समितिका संयोजक मुक्ति पौडेलको अध्यक्षतामा सम्पन्न दाता सम्मान कार्यक्रमको स्वागत उपाध्यक्ष खडानन्द भण्डारीले र सञ्चालन सल्लाहकार समिति सदस्य शुभद्रा भट्टराई अर्यालले गरेकी थिइन् ।
Discussion about this post