चारपटक धाउँदा पनि घरधनि भेटिएन : गणक

मेचीनगर, २९ कात्तिक । हाल देशैभर जनगणनाको कार्य भइरहेको छ ।

कात्तिक २५ गतेबाट सुरु भएको जनणनाले नागरिकको आर्थिक, धार्मिक, जातीय, बसाइबराई, रोजगार लगायत सम्पूर्ण पहिचानको सत्यतथ्य तथ्यांक संकलन गर्ने उद्देश्य लिएको छ ।

तर तथ्यांक लिने क्रममा गणकहरुले भने काहिँ सत्कार त काहिँ सास्ती पाउने गरेका छन् ।

आफ्नो जिम्मामा धुलावारीको शान्तिटोलका २१० घरधुरी परेको बताउने मेचीनगर वडा नं. १० का गणक अजित नेम्वाङले केही घरमा चार पटक धाउनु परेको अनुभूति सुनाएका छन् ।

‘आज गयो भेटिनुहुँदैन, भोलि गयो भेटिनुहुँदैन,’ उनले गणना गर्न घरघर धाउँदाको अनुभूति सुनाउँदै भने–‘चार पल्ट धाउँदा बल्ल भेटिनुभयो ।’

अजितले धेरैपटक धाएर पनि सही विवरण लिन गाह्रो नमानेको तर यसरी एकै पटकमा हुने काम धेरै समय लगाउनु पर्दा कामको गति घट्ने बताए ।

चार दिनसम्म तालिम लिएर खटिएका उनलाई दैनिक १५ घरको जनगणना लिनु भन्ने निर्देशन रहेको बताए । तर नागरिकहरु सचेत नभइदिदा गणकले सास्ती व्यहोर्नु परेको छ ।

जनगणना सफल तुल्याउन हरेक नागरिकको उत्तिकै दायित्व छ । विभिन्न विज्ञापन र सन्देशमार्फत आम नागरिकलाई जनगणनामा उत्साहपूर्वक सहभागी बन्न सरकारले आग्रह गर्दै आएको छ ।

तर, आम मानिस व्यापार, व्यवसाय, जागिर र अरु कामको व्यस्तता देखाएर गणकलाई समय दिन बिलम्ब गर्छन् ।
जनगणना गर्दा धेरै किसिमका व्यक्तिगत प्रश्नहरु सोध्नु पर्ने भएकाले सानो परिवारमा पनि कम्तीमा आधा घण्टा समय लाग्ने अजितले बताए ।

‘१४ दिनमा जसरी भए पनि २१० घर सक्नु पर्ने हुन्छ, । तर यही अवस्था हो भने दिनमा १५ घरको गणना पूरा गर्न गाह्रो छ,’ उनले सुनाए–‘कहिलेकाही भने एउटै घरमा चार पटक जाँदा पनि मान्छे भेटिदैनन् त्यतिवेला भने हैरान हुन्छ ।’

उनले सबै घरपति फरक स्वभावको हुने बताए । कुनैकुनै घरमा चियाखाजाको प्रस्ताव आउने गरेको तर आफुले नलिएको उनको भनाई छ । कामका बारेमा ध्यान हुने भएकाले चिया खाजामा भुलिएर बस्न नसकिने उनले बताए ।

गणक नेम्वाङ साइकलमा हिडेर जनगणनाको कार्य गरिरहेका छन् । उनले राष्ट्रको यत्रो ठूलो कामको जिम्मेवारी आफूले पनि पाएकोमा खुशी व्यक्त गरे ।