झापा, १८ बैशाख । मकवानपुर स्थित थाहा नगरपालिका–७ का वडाध्यक्ष शिवराज थिङ गाँजासहित पक्राउ परेका छन् ।
आज विहान ८ बजे लागुऔषध नियन्त्रण व्यूरो र इलाका प्रहरी कार्यालय पालुङको टोलीले वडाध्यक्ष थिङसहित ३ जनालाई गाँजासहित पक्राउ गरेको जिल्ला प्रहरी कार्यालय मकवानपुरका प्रवक्ता एवम् डीएसपी टेकबहादुर कार्कीले बताए ।
पक्राउ पर्नेमा थाहा नगरपालिका–७ स्थित आग्राका वडाध्यक्ष शिवराज थिङ, ७६ वर्षीय भीमबहादुर थिङ र ६७ वर्षीय इन्द्रबहादुर थिङ छन् ।
इन्द्रबहादुरको घरमा प्रहरीले जाँच गर्दा १७५ किलोग्राम गाँजा, वडाध्यक्ष थिङ र भीमबहादुरको घरबाट ३० वटा पोकामा २७ किलो गाँजाको धुलो फेला परेको डीएसपी कार्कीले बताए ।
गाँजासहित पक्राउ परेका तीनै जनालाई इलाका प्रहरी कार्यालय पालुङको नियन्त्रणमा राखिएको प्रहरीले जनाएको छ ।
Discussion about this post