दमक, २१ वैशाख । दमकमा कक्षा १२ को परीक्षा दिएर घर फर्किंदै गरेकी एक छात्रामाथि आक्रमण भएको छ ।
आक्रमणमा परेर १८ वर्षकी एक छात्रा घाइते भएको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए ।
उनको दमक स्थित लाइफ लाइन अस्पतालमा उपचार भइरहेको छ । घाइते छात्रा दमकको हिमालय माध्यमिक विद्यालयमा अध्ययनरत रहेको प्रहरीले जनाएको छ ।
उनको पेटमा गोलीको छर्रा जस्ता वस्तु लागेको छ । झापाका प्रमुख जिल्ला अधिकारी बन्धुप्रसाद बाँस्तोलाका अनुसार उनको शरीरको दुई ठाउँमा चोट देखिएको र प्रारम्भिक अनुसन्धानका क्रममा प्रहरी गोली लागेको अनुमानमा पुगेको छ ।
छात्राको कपडामा गोलीजस्तो देखिने वस्तु फेला परेको प्रहरीको भनाइ छ । उनले भने, ‘आक्रमणकारीको पहिचान भइसकेको छ, नाका सिल गरेर खोजी कार्य जारी छ ।’
उनको अवस्था सामान्य रहेको र पेटमा डढेको, दबेको, ददारिएको जस्तो चोट देखिएको प्रहरीले जनाएको छ ।
Discussion about this post