मेचीनगर, १७ असाेज । नेपालमा प्रतिबन्धित भारतीय चिठ्ठासहित काँकरभिट्टाका एक जनालाई प्रहरीले पक्राउ गरेकाे छ ।
शनिबार विहान ११ वजे भारतीय चिठ्ठा, नगदसहित मेचीनगर-६ निवासी ४५ वर्षीय गेलु शेर्पालाई जिल्ला प्रहरी कार्यालय र इलाका प्रहरी कार्यालय काँकरभिट्टाले घरैबाट पक्राउ गरेकाे हाे ।
प्रहरीले उनकाे साथबाट राेयल लेखिएकाे १०० पिसका १३ बुङ भारतीय चिठ्ठा र नगद ३६ हजार ५ सय बरामद गरेकाे छ ।
काँकरभिट्टा लगायत झापाका सीमावर्ती क्षेत्रका बजारमा प्रतिबन्धित भारतीय चिठ्ठा खुलेआम बिक्री वितरण भइरहेकाे छ ।
काँकरभिट्टा बजारका चाेक, गल्लीका पसल र विभिन्न व्यक्तिहरूले भारती चिठ्ठा बेच्ने गरेका छन् ।
भारतीय चिठ्ठा अवैध रूपमा बिक्री वितरण गर्दा पनि प्रहरी भने माैन रहेकाे स्थानीयकाे भनाई छ । यस्ता चिठ्ठा बेच्ने काँकरभिट्टामा छ्याप छ्याप्ति रहेकाे उनीहरूकाे भनाई छ ।
चिठ्ठा पर्ने लाेभमा धेरैकाे घरबार विग्रिएकाे गुनासाे छ । भारती रूपैयाँ १ कराेडसम्म पर्ने लाेभमा सिटी रिक्सा चालकदेखि राम्राे व्यापारी र स्थानीय समाजसेवीहरूकाे दैनिक लाखौं रूपैयाँ भारत गइरहेकाे छ ।
Discussion about this post