ओलीले युवालाई भने–‘जागिरे प्रवृति छाडेर उद्यमशीलतामा लागौँ’

शिवसताक्षी, २४ माघ । नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले युवाहरुलाई जागिरे प्रवृतिमा भन्दा उद्यमशिलतामा लाग्न आग्रह गरेका छन् ।

मंगलबार शिवसताक्षी नगरपालिका–४ स्थित झापा इनर्जी लिमिटेडको उद्घाटन गर्दै उनले युवाहरुलाई जागिरे प्रवृति छाडेर उद्यमशिलतामा लागेर उत्पादन गर्न अनुरोध गरेका हुन् ।

आफु प्रधानमन्त्री भएको बेला शैक्षिक प्रमाणपत्र र परियोजना धितो राखेर कर्जा लिन पाउने व्यवस्थाको सुरुवात गरेको स्मरण गराउँदै नेपालमा विकास हुनसक्छ भन्ने उदाहरण झापा इनर्जी रहेको बताए ।

कृषि, ऊर्जा र प्रविधिमा फड्को मार्ने विकास आवश्यक भएको बताउँदै नेपालमा जलविद्युत मात्र ऊर्जाको स्रोत भनेर बुझ्न नहुने जनाउँदै सौर्य र हाइड्रोजन ऊर्जाको सम्भावना खोज्नु पर्ने दावी गरे ।

कार्यक्रममा झापा इनर्जी लिमिटेडका अध्यक्ष एवम् संघीय सांसद एलपी साँवाले परियोजनाबाट वर्षमा एक करोड ७६ लाख १० हजार युनिट विद्युत उत्पादन हुने बताए । उनले वर्षेनी १२ करोड ८५ लाख आम्दानी हुने दावी दिए ।

झापा इनर्जी प्रालिबाट उत्पादित १० मेगावाट विद्युत नेपाल विद्युत प्राधिकरणको प्रशारण लाइनमा गत पुस ११ गतेबाट जोडिएको छ । पूर्वपश्चिम राजमार्गको दुधेबाट १० किलोमिटर दक्षिण गाउँमा २१ बिगाहा क्षेत्रफलमा परियोजनाको सौर्य प्यानल राखिएको छ ।

झापा क्षेत्र नं. ४ का प्रतिनिधिसभा सदस्य एलपी साँवाको नेतृत्वमा ८७ करोडको लगानीमा चार वर्षअघि परियोजनाको निर्माण सुरु भएको थियो । परियोजनामा माछापुच्छ«े बैंक र सिभिल बैकको ७५ प्रतिशत वित्तीय साझेदारी र २५ प्रतिशत पब्लिक शेयर रहेको छ ।

झापा इनर्जी प्रालि र नेपाल विद्युत प्राधिकरणबीच २०७८ मंसिर १२ गते विद्युत खरिद सम्झौता भएको थियो । सम्झौता अनुसार परियोजनाबाट उत्पादित विजुली प्राधिकरणले प्रतियूनिट ७ रुपैयाँ ३० पैसामा खरिद गर्ने भएको छ ।

झापा इनर्जी कोशी प्रदेशको सबैभन्दा धेरै क्षमताको सौर्य ऊर्जा परियोजना हो । संविधानसभाका सदस्य स्व. सुभाषचन्द्र नेम्बाङले दुई वर्ष अघि परियोजनाको शिलान्यास गरेका थिए । नेपाल विद्युत प्राधिकरणको शिवसताक्षीस्थित बुलुचोक सबस्टेसनमा उक्त सौर्य ऊर्जा जोडिएको छ ।

परियोजना स्थललाई पुष्प बगैचाको रुपमा समेत विकास गरी आन्तरिक पर्यटन आकर्षित गर्ने योजना रहेको उनको भनाई छ ।

ओली र नेपाली कांग्रेसका महामन्त्री विश्वप्रकाश शर्मा काठमाडौंबाट मंगलबार विहान सौर्य एयरलायन्सको एउटै जहाजबाट सँगै गृहजिल्ला आएका थिए ।