मेचीनगर, ४ फागुन । इण्डियन आइडलको उत्कृष्ट १० मा पर्न सफल झापाकी चर्चित गायिका मेनुका पौडेलले शनिबार धुलाबारीमा सांगातिक प्रस्तुति दिने भएकी छन् ।
शुक्रबार मेचीनगर–१० स्थित खयरडाँगीको मंगल चोक मंगल मार्ग संरक्षण समितिले पत्रकार सम्मेलनको आयोजना गरेर सो कुरा जानकारी गराएको हो ।
समितिका अध्यक्ष गोकुल खड्काले गायिका पौडेल इण्डियन आइडलको सोपछि पूर्वाञ्चलमा नै पहिलो पटक धुलाबारीको सांगातिक कार्यक्रममा आउने भएको बताए ।
शनिबार साँझ मंगल चोकमा हुने कार्यक्रममा गायिका पौडेलसँगै मेचीनगर निवासी राष्ट्रिय कलाकार जमिन अली लगायत स्थानीय कलाकारहरुको पनि वेजोड प्रस्तुति रहने आयोजकको भनाई छ ।
आयोजकले सांगातिक कार्यक्रममा गायिका पौडेलको प्रस्तुतिको अडियो–भिडियो युट्युवमा अपलोड नगर्न समेत अनुरोध गरेको छ ।
समितिले गायिका पौडेललाई अभिनन्दन गर्ने भएको छ । उनलाई नगदसहित सम्मान गरिने खड्काले जानकारी दिए ।
उक्त कार्यक्रम गर्न करिव एक लाख ५० हजार खर्च लाग्ने उनले बताए । ३ वर्षअघि स्थापना गरिएको समितिले हरेक वर्ष सरस्वती पुजाको अवसरमा सांगातिक कार्यक्रम गर्दै आएको छ । यसवर्ष त्यसैको निरन्तरता रहेको आयोजकले जनाएको छ ।
कार्यक्रमको सञ्चालन समितिका सहयोगी एवम् स्थानीय समाजसेवी धमेन्द्र खड्काले गरेका थिए ।
Discussion about this post