झापा, ७ साउन । बिर्तामोड नगरपालिकाले नगरवासीलाई विषादीरहित अर्गानिक तरकारी खुवाउने उदेश्यले सामुदायिक तरकारी बिक्री केन्द्र आजदेखि सञ्चालनमा ल्याएको छ ।
नगरले तयार पारेको ५ वटा तरकारी बिक्री केन्द्र मध्ये ४ वटा संकलन तथा बिक्री केन्द्र र एउटा मुख्य संकलन तथा बिक्री केन्द्र मध्ये सोमबार २ वटा बिक्री केन्द्रको उद्घाटन गरिएको हो ।
‘पारीको होइन बारीको खाउँ’ भन्ने मुल उदेश्यका साथ अघि बढाईएको यस कार्यक्रम अन्तर्गत रहेका बिर्तामोड–५ को तमुटोल सामुदायिक तरकारी बिक्री केन्द्र र पाथिभरा बालाजी सामुदायिक तरकारी बिक्री केन्द्रको उद्घाटन गरिएको छ ।
तमुटोल सामुदायिक तरकारी बिक्री केन्द्रको कार्यवाहक मेयर सीता ढुंगाना तथा पाथिभरा बालाजी सामुदायिक तरकारी बिक्री केन्द्रको निवर्तमान मेयर ध्रुवकुमार शिवाकोटी र वडा नम्बर ५ का वडाध्यक्ष रोहित प्रसाईले उद्घाटन गरेका हुन् ।
कार्यक्रममा निवर्तमान मेयर शिवाकोटीले खाली जमिनलाई बाँझो नराखी अर्गानिक तरकारी उत्पादन गर्न सबैलाई आग्रह गरे । विषादी हालिएका तरकारीबाटै प्राणघातक रोग लाग्ने गरेको भन्दै उनले यसबाट बच्नको लागि विषादीरहित भान्छामा जोड दिए ।
यस्तै वडा नम्बर ५ का वडाध्यक्ष प्रसाईले नगरको यो कार्यक्रम सफल बनाउन सहभागी सबैलाई आग्रह गर्दै आगामी दिनमा यस प्रकारका विक्री केन्द्र सबै टोलमा बिस्तार गर्न सकिने बताए । सबैजना अर्गानिक तरकारी उपभोगमा लाग्ने हो भने भारत जाने पैसासमेत रोकिने उनको भनाई थियो ।
बिर्तामोड नगरपालिकाले कार्यक्रम सफल बनाउन चालुआर्थिक वर्ष भित्रै तरकारी संकलनका लागि एउटा गाडीसमेत खरिद गर्ने बताएको छ ।
बिक्री केन्द्रका अध्यक्ष युवराज चिमरीयाको अध्यक्षतामा आयोजित उद्घाटन कार्यक्रममा कार्यपालिका सदस्य संगीता शिवा, वडा नम्बर ५ का वडा सदस्य ओमभक्त सेडाई, व्यवसायी नारायण चिमरीया लगायत विभिन्न व्यवसायी, कृषक, उपभोक्ताहरुको सहभागिता रहेको थियो ।
नगरपालिकाले अन्य वडामा रहेका संकलन तथा बिक्री केन्द्रहरुको क्रमशः उद्घाटन गर्दै जाने कृषि शाखा प्रमुख राजेन्द्र कडरियाले जानकारी दिए ।
Discussion about this post