मेचीनगर, ३१ जेठ । मेचीनगर नगरपालिका-८ मा आजदेखि ७ दिने महिला सीप विकास तालिम सुरु भएको छ ।
वडा कार्यालयको आर्थिक सहयोगमा बुधबारदेखि सुरू भएको शुभ विवाहमा प्रयोग हुने बरमाला, जडीमाला, साइपाटा, ठेकी, किस्ती निर्माण तथा श्रृङ्गार सम्बन्धी तालिमको उद्घाटन वडा नम्बर ८ का वडाध्यक्ष गिरीराज धमलाले गरेका छन् ।
कार्यक्रममा धमलाले हातमा सीप भए कोहीपनि बेरोजगार बस्नु नपर्ने बताएका छन् ।
उनले अहिले बेरोजगारीको संख्या दिनप्रतिदिन बढ्दै गएकाेले वडाले महिलाहरूलाई दक्ष बनाउन तालिमको आयोजना गरिएको बताए ।
यसअघि बेरोजगार पुरूषहरूको लागि पनि इलेक्ट्रोनिक सम्बन्धी तालिमको आयोजना गरिसकेको उनकाे भनाई छ ।
कार्यक्रममा कार्यपालिका सदस्य तथा मेचीनगर भौतिक पुर्वाधार विकास समिति संयोजक चित्र धिमाल, वडा सदस्यहरू कुन्दन निरौला, बिष्णु भट्टराई, कविता खनाल सार्की, मनकुमारी गिरी लगायतले शुभकामना मन्तव्य राखेका थिए ।
आस्था डेकोरेशन उद्योग मेचीनगर-८ ले दिने महिला सीप विकास तालिममा वडाको ३९ वटा टोलबाट एक-एक जना महिलाहरूको सहभागीता रहेको मेचीनगर-८ कि वडासचिव पवित्रा सुब्बाले बताए ।
Discussion about this post