घिमिरेले गरे नगर सचिवमा उम्मेद्वारी घोषणा

मेचीनगर, २१ भदौ । नेपाली कांग्रेस मेचीनगरको सचिव पदमा वाणिज्य शास्त्रमा स्नातक युवा मनोज घिमिरेले उम्मेद्वारी घोषणा गरेका छन् ।

आज अपरान्ह धुलावारीको होटल रोयल निर्वाणमा पत्रकार भेटघाट आयोजना गरी मेचीनगर– १० निवासी ३८ वर्षीय घिमिरेले नयाँ परिवेशमा युवाहरु राजनीतिको अग्रपंक्तिमा आउन जरुरी ठानेर सचिव जस्तो महत्वपूर्ण पदमा आकांक्षा राखेको बताए ।

उनले राजनीतिलाई देश र जनताको सेवा गर्ने माध्यमको रुपमा लिएको बताए । उनी भर्खरै मेचीनगर वडा नं. १० बाट क्षेत्रीय प्रतिनिधिमा सर्वसम्मत चयन भएका छन् ।

२०५४ सालमा नेविसंघको सदस्यता लिएका उनी २०५६ मा संघको कनकाई क्याम्पस इकाई समिति सदस्य, २०६३ मा संघको जिल्ला सदस्य र २०७० देखि नेपाल तरुण दल मेचीनगरको सचिवको जिम्मेवारीमा थिए ।

२०६२÷०६३ को जनान्दोलनमा सक्रिय सहभागी उनी वीपी कोइरालालाई आदर्श नेता र उनको विचारलाई सबैभन्दा राम्रो विचार ठान्छन् । उनले आफु कुनै विचार समूह (गुट)मा नलागेको बताएका छन् ।

‘म कुनै गुटको उम्मेद्वार बन्न चाहन्न,’ उनले पत्रकार सम्मेलनमा भने–‘सबैलाई समन्वय गरेर लैजान सक्ने क्षमता मसँग छ । सही मान्छे सही ठाउँमा हुनुपर्छ भन्ने ठानेर मैले सचिव पदमा न्याय गर्न सक्छु भनेरै उम्मेद्वारी घोषणा गरेको हुँ ।’

उनी सामाजिक गतिविधिमा निकै सक्रिय युवा नेता हुन् । हाम्रो धुलावारी राम्रो धुलावारी, धुलावारी युनिटी, स्वास्थ्य महोत्सव जस्ता कार्यमा उनले अग्रणी भूमिका निर्वाह गरेका थिए । मेची उद्योग वाणिज्य संघको एक कार्यकाल कार्यकारिणी सदस्य समेत थिए उनी ।

कांग्रेसको नयाँ विधान अनुसार नगर कार्यसमिति ७५ सदस्यीय रहनेछ । जसमा एक सभापति, दुई उपसभापति, दुई सचिव, दुई सहसचिव र एक कोषाध्यक्ष हुनेछ । नगर अधिवेशन यही भदौ २७ गते हुँदैछ ।

पत्रकार सम्मेलनमा मेचीनगर वडा नं. १० का नवनिर्वाचित वडा सभापति चन्द्र तिवारीको उपस्थिति रहेको थियो । तिवारीले घिमिरेको उम्मेद्वारी स्वागतयोग्य रहेको बताए ।