काँकरभिट्टामा ट्राफिककाे ह्वील लक, पर्यटकलाई सास्ती

।। अर्जुन कार्की ।।

मेचीनगर, १५ भदाै । भारत तथा अन्य देशबाट नेपाल घुम्न आएका पर्यटकहरूलाई सीमावर्ती नाका काँकरभिट्टामा ट्राफिक प्रहरीले गाडीमा ह्वील लक लगाउने गरेकाे छ ।

उक्त लक लगाए बापत पर्यटकले रू.५०० देखि माथि जरिवाना लिएर छाड्ने गरेको छ ।

केही महिनाअघि गृहमन्त्री सुधन गुरूङ काँकरभिट्टा बजार निरीक्षणमा आएका बेला पुरानाे सुपारी लाइन, बसपार्क लगायतका ठाउँमा भारतीय गाडीहरूकाे अनाधिकृत पार्किङ रहेकाे भन्दै हटाउन निर्देशन दिएका थिए ।

गृहमन्त्री गुरूङकाे आदेशपछि ट्राफिक प्रहरीले काँकरभिट्टा क्षेत्रमा भारती गाडी अनाधिकृत रूपमा पार्किङ गरेकाे देखाे कि टायरमा ह्वील लक लगाएर जरिवाना लिएर छाड्ने गरेकाे छ ।

त्यसाे त नेपाल नम्बरका गाडीहरूलाई पनि त्यसै गर्ने गरेको छ । उक्त कार्यकाे पर्यटक र स्थानीयले गुनासाे गर्न थालेका छन् ।

यस्तै साेमबार एउटा घटना घट्याे । दार्जिलिङबाट भारतीय जिप लिएर नेपाल आएका पर्यटकले मेची भन्सार कार्यालयबाट भन्सार तिरेर काँकरभिट्टा प्रवेश गरेकाे थियाे ।

काँकरभिट्टा बसपार्क उत्तर पुरानाे सुपारी लाइन जहाँ मिनी क्यासिनाे लगायतकाे सानाे मार्केट छ ।

ती पर्यटकले त्यहाँ सडक छेउ बन्द भएको पसलकाे पेटीमा जिप पार्किङ गरेर राखे । मार्केट घुमेर फर्किदा गाडीमा ह्वील लक लागेकाे थियाे ।

एकजना ट्राफिक प्रहरीले पर्यटकलाई भन्याे-´नाे पार्किङ जाेन हाे, गाडी राख्न मिल्दैन फाइन लाग्छ ।`

पर्यटकले भन्याे-´हामीलाई यहाँ पार्किङ गर्न हुँदैन भनेर थाहा थिएन । पार्किङ गर्ने ठाउँमा हामीलाई कसैले देखाएन । मैले सडकदेखि परै राखेकाे थिए । समस्या पर्दैन जस्ताे लागेर राखे । भरे प्रहरीले लक लगाए छ । फाइन तिर्नु पर्छ भनेकाे छ ।`

उनी जस्ता बाह्य पर्यटकले याे नियती भाेगेकाे धेरै जना छन् । उनी त एउटा प्रतिनिधि पात्र मात्र हुन् ।

भारत तथा अन्य मुलुकबाट गाडी लिएर आउने पर्यटकले काँकरभिट्टामा पार्किङ छैन् । अन्य नाका प्रयाेग गर्नु पर्छ भन्ने मानसिकता बनाउन थालेका छन् ।

अहिले धेरै पर्यटकहरू मिरिकबाट पशुपति, रानीबाट विराटनगर, गलगलियाबाट भद्रपुर लगायतका नाका प्रयाेग गरेर नेपाल छिर्ने गरेकाे स्थानीयकाे भनाई छ ।

यस विषयमा ट्राफिक प्रहरी पाेष्ट काँकरभिट्टाका प्रमुख प्रहरी नायव निरीक्षक (सई) नारायण राईले अनाधिकृत रूपमा पार्किङ गरेर राखिएका गाडीहरूलाई लक लगाउने गरिएको बताए ।

उनले काँकरभिट्टामा आन्तरिक तथा पर्यटकका लागि गाडी पार्किङ गर्ने निश्चित ठाउँ नभएको स्वीकार गरे ।

इलाका प्रहरी कार्यालय काँकरभिट्टाका प्रमुख डीएसपी निशेष चापागाईंले गृहमन्त्रीकाे निरीक्षणपछि अनाधिकृत पार्किङलाई कडा गरिएको दावी गरे ।

उनले पार्किङलाई व्यवस्थित गर्न स्थानीय सरकार, जिल्ला प्रशासन कार्यालयसँग समन्वय गरेरअघि बढ्न सकिने तर्क गरेका छन् ।

स्थानीयबासी भन्छन्-´बाह्य पर्यटकलाई समस्या भयाे । आन्तरिक पर्यटकलाई पनि गाराे छ । व्यवस्थित पार्किङ अत्यआवश्यक छ । मार्केटकाे गल्ली अनुसार पार्किङ आलोपालाे गरिदिनु पर्छ । पार्किङ भएन भने पर्यटकहरू अन्य नाकाबाट जान्छन् । यहाँको व्यापार सुक्छ ।`

काँकरभिट्टाका अधिकांश स्थानीयले भारतीय गाडी घरमा राख्ने गरेका छन् । कसैले भन्सार काटेर, कसैले नकाटी राख्ने गरेकाे गुनासाे छ । त्यसमा प्रहरी र भन्सार कर्मचारीले चासाे नदिएकाे स्थानीयकाे आरोप छ ।

झापाका प्रमुख जिल्ला अधिकारी शिवराम गेलाल (सीडीओ) ले काँकरभिट्टामा पार्किङ नभएका कारण पर्यटकले दु:ख पाएकाे बताए ।

उनले यसका लागि नगरपालिका र स्थानीय प्रहरीसँग बुझेर समाधानकाे बाटाेतिर लाने प्रयास गर्ने जानकारी दिए ।

नेपाल-भारतकाे १९५० काे सम्धी अनुसार भारतीय गाडीलाई नजिकैकाे बजार धुलाबारीसम्म दिनभरीलाई नि:शुल्क छ ।

भारतकाे सीमा नाका नक्लसबारी बजारसम्म याे सुविधा छ । तर, भारतीय पक्षले याे सुविधा दिएकाे छैन । नेपालले भने याे सुविधा दिइरहेको छ ।

त्यस्तै अस्थायी पैठारीका रूपमा धुलाबारीदेखि पश्चिम जहाँ गएपनि विहान साढे ८ वजेदेखि बेलुका गेट बन्द नहुन्जेल राति १० वजेसम्मका लागि माेटरसाइकललाई २०० रूपैयाँ र कार, जिपलाई ६०० रूपैयाँ  भन्सार लाग्ने छ ।