कारवाहीमा परेका १३ औषधि पसल मध्ये ३ वटाले जरिवाना तिरेर खाेले

मेचीनगर, २४ असाेज । मेचीनगर नगरपालिकाले बजार अनुगमनका क्रममा कारवाहीमा परेका औषधि पसलहरूलाई जरिवाना ताेकेकाे छ ।

नगरपालिकाले चारआलीकाे मनकामना अस्पताल  र धुलाबारीकाे सामुदायिक स्वास्थ्य सेवा प्रालिलाई जनही दुई लाख ५० हजारका दरले जरिवाना गरेकाे बजार अनुगमन टाेली प्रमुख दिपेन्द्र कार्कीले जानकारी दिए ।

कार्कीका अनुसार अन्य मेडिकलहरूलाई जनही ७५ हजारका दरले जरिवाना गरेकाे छ ।

७५ हजार जरिवाना ताेकिएका औषधि पसलहरूमा प्रतिमा जमुना मेडिकल, शिखर अस्पताल, न्यु मिलन मेडिकल, राेहन मेडिकल, दिव्यान्सी मेडिकल, बरूनाभ मेडिकल, काँकरभिट्टा आईकेयर सेन्टर, भराेषा मेडिकल हल, तेजस्वी मेडिकल, रस्मिका फार्मेसी र जीवन रक्षा मेडिकल रहेका छन् ।

नगरपालिकाका प्रमुख प्रशासकीय अधिकृत सुवास श्रेष्ठले कारवाहीमा परेका १३ वटा अस्पताल र मेडिकल मध्ये २ वटालाई  दुई लाख ५० हजारका दरले र अन्य ११ वटालाई ७५ हजारका दरले जरिवाना गरिएको बताए ।

कारवाहीमा परेका शिखर अस्पताल, न्यु मिलन मेडिकल र राेहन मेडिकलले शुक्रबार नगरपालिका आएर जरिवाना तिरिसकेकाे स्वास्थ्य शाखा प्रमुख सविता सापकोटाले जानकारी दिइन् । उनीहरूकाे शिल लगाएकाे ताला शनिबार खाेलिएकाे छ ।

धुलाबारीकाे हरि हलेसी मेडिकल हलले आवश्याक कागजात पुर्याएकाे प्रमाण पत्र पेश गरेपछि एक्सरे काेठामा लगाएकाे शिल खाेलिएकाे कार्कीले बताए ।

बजार अनुगमनका क्रममा चारआलीमा बिना दर्ता सञ्चालन गरेको मनकामना अस्पताल शिल गरेकाे थियाे ।

त्यस्तै, धुलाबारीकाे प्रतिमा जमुना मेडिकलकाे ल्याव, शिखर अस्पतालकाे ल्याव, न्यु मिलन मेडिकलको ल्याव, राेहन मेडिकलकाे क्लिनिक, हरि हलेसी मेडिकलकाे एक्सरे, दिव्यान्सी मेडिकल हलकाे क्लिनिक, सामुदायिक स्वास्थ्य सेवा प्रालिकाे ल्याव र क्लिनिक शिल गरिएकाे थियाे ।

यसैगरी, बरूनाभकाे ल्याव र क्लिनिक, काँकरभिट्टा आईकेयर सेन्टरकाे ल्याव, भराेषा मेडिकलकाे ल्याव र क्लिनिक, तेजस्वी फार्मेसीकाे ल्याव र क्लिनिक, रस्मिका फार्मेसीकाे ल्याव र जीवन रक्षाकाे ल्याव शिल गरिएको थियाे ।