झापा, २८ असाेज । जिल्ला प्रशासन कार्यालय झापाले बजार अनुगमनका क्रममा उपभोक्ता हित विपरित कार्य गर्ने पाँच जना व्यवसायीलाई कारवाही गरेकाे छ ।
प्रशासनले गत भदाै २० गतेदेखि असाेज २८ गतेसम्म जिल्लाका १३४ वटा फर्म र व्यावसायकाे पसलमा अनुगमन तथा निरीक्षण गर्दा ५ वटा पसललाई कारवाही गरेकाे हाे ।
उनीहरूलाई कारवाही गर्दा पाँच लाख १५ हजार रुपैयाँ जरिवाना गरिएकाे जिल्ला प्रशासन कार्यालय झापाले जनाएकाे छ ।
अनुगमनका क्रममा म्याद गुज्रिएका सामग्री बिक्री गर्ने, अस्वाभाविक मूल्य लिने तथा अखाद्य वस्तु बिक्री वितरण गर्ने व्यवसायीमाथि कारबाही गरिएको थियाे ।
म्याद गुज्रिएको गाईको दाना बिक्री गर्ने दास किराना पसल र अस्वाभाविक मूल्यमा फिनिसिङ वायर बिक्री गर्ने शिवम् ट्रेड एन्ड सप्लायर्सलाई दुई–दुई लाख रुपैयाँ जरिवाना गरिएको थियाे ।
त्यस्तै, श्रीराम अमिलो भण्डार र कमल आइस उद्योगलाई ५०-५० हजार रुपैयाँ, ओमशान्ति मिठाइ भण्डारलाई १५ हजार रुपैयाँ जरिवाना गरिएको छ भने दमक-९ स्थित मुना स्टोर्सलाई सचेत गराइएको छ ।
अनुगमनका क्रममा दुई लाख ४० हजार ४ सय ४३ रुपैयाँ बराबरका म्याद गुज्रिएका अखाद्य सामग्री नष्ट गरिएको कार्यालयले जनाएको भनाई छ ।
बुधबार काँकरभिट्टाकाे पानी उद्योगमा अनुगमन
यस्तै, खाद्य प्रबिधि तथा गुण नियन्त्रण डिभिजन कार्यालय झापा, मेचीनगर नगरपालिका र इलाका प्रहरी कार्यालयकाे संयुक्त बजार अनुगमन टाेलीले बुधबार विहान मेचीनगर-६, शान्ति गाउँ स्थित भट्टराई ब्रदर्श वेभरेज (उद्योग ) मा २० लिटरकाे ५ वटा जार कुचिएकाे, काेत्रिएकाे र ५९ वटा जारमा पूर्णरूपमा लेवलकाे विवरण उल्लेख नभएकाे पाइएकाे थियाे ।
नगरपालिकाका खाद्य विश्लेषक दिपेन्द्र कार्कीले ५ वटा जार नष्ट गरिएको र ५९ वटा जारकाे लेवल विवरण २४ घण्टाभित्र उपलब्ध गराउन निर्देशन गरिएको बताए ।
पानी उद्योगकाे अनुगमन टाेलीमा खाद्य प्रबिधि तथा गुण नियन्त्रण डिभिजन कार्यालय झापाका प्रमुख सुवासचन्द्र ओस्ती, नगरपालिकाका खाद्य विश्लेषक कार्की, इलाका प्रहरी कार्यालय काँकरभिट्टाका प्रहरी नायव निरीक्षक नारायण प्रसाद भट्टराई, नगरप्रहरीका इन्चार्ज श्याम गिरी, नगरप्रहरीहरू प्रकाश बानियाँ, नारायण खनाल लगायत रहेका थिए ।
खाद्य प्रबिधि तथा गुण नियन्त्रण डिभिजन कार्यालय झापामा २० लिटरकाे प्रशाेधित पिउने पानीकाे जारमा लेवल नभएको उजुरी आएपछि उद्योगमा अनुगमन गरिएको थियाे ।
Discussion about this post