मेचीनगर, २३ साउन । राष्ट्रिय सामुदायिक वन दिवसको अवसरमा सामुदायिक वन उपभोक्ता महासंघ मेचीनगरले आयोजना गरेको अन्तर समूह हाजिरी जवाफ प्रतियोगितामा मागुरमाडी विट नं.२ प्रथम भएको छ ।
शुक्रबार सामुदायिक वन उपभोक्ता महासंघ मेचीनगरले वडा नं.९ स्थित थोप्लेविरान सामुदायिक वन उपभोक्ता समूह परिसरमा आयोजना गरेको प्रतियोगितामा मागुरमाडी सामुदायिक वन उपभोक्ता समूह विट नं.२ प्रथम भएको हो ।
प्रतियोगितामा थोप्लेविरान सामुदायिक वन दोस्रो, तेलपानी सामुदायिक वन तेस्रो र दुधेचौँरी सामुदायिक वन सान्तवना भएको थियो । विजेताहरुलाई नगदसहित प्रमाणपत्र वितरण गरिएको थियो ।
विजेताहरुलाई पुरस्कारको नगद राशि वडा नं.१० का वडाध्यक्ष नारायण खनाल, समाजसेवीहरु ऋषिराज तिम्सिना र उद्धव बानियाँले सहयोग गरेका थिए । प्रमुख अतिथि, अतिथिहरुले विरुवा रोपेर कार्यक्रमको उद्घाटन गरेका थिए ।
कार्यक्रमका प्रमुख अतिथि मेचीनगर–९ का वडाध्यक्ष कञ्चनकुमार तामाङ, सामुदायिक वन महासंघ झापाका अध्यक्ष वेदप्रकाश भण्डारी, मेची उद्योग बाणिज्य संघका पूर्व अध्यक्ष ऋषिराज तिम्सिना लगायतले शुभकामना मन्तव्य व्यक्त गरेका थिए ।
यही साउन २५ गते राष्ट्रिय सामुदायिक वन दिवसका दिन मेचीनगरका १३ वटै सामुदायिक वनहरुमा नेपाल र वनको झण्डा झण्डोत्तलन गर्न वितरण समेत गरिएको छ ।
युवाहरुलाई वन, वातावरण र कानूनका विषयमा जानकारी गराउने उदेश्यले हाजिरी जवाफ प्रतियोगिता आयोजना गरिएको नगर महासंघले जनाएको छ ।
सामुदायिक वन उपभोक्ता महासंघ मेचीनगरकी अध्यक्ष जानुका ओली न्यौपानेले कार्यक्रमको औचित्यमाथि प्रकाशसहित अध्यक्षता गरेकी थिइन् । कार्यक्रममा स्वागत गीत देवीस्थान जलेश्वारधाम वडा नं.९ का अध्यक्ष अनबहादुर भुजेलले गरेका थिए ।
हाजिरी जवाफ प्रतियोगिताको सञ्चालन सव डिभिजन कार्यालयका वन अधिकृत डिल्लीराम खरेलले र औपचारिक कार्यक्रमको सञ्चालन महासंघ नगर सचिव युवराज रेग्मीले गरेका थिए ।
Discussion about this post