मेचीनगर, ९ मंसिर । घरेलु तथा साना उद्योग कार्यालयले मेची उद्योग बाणिज्य संघको समन्वयमा ११ औँ राष्ट्रिय उद्योग दिवस मनाएको छ ।
मंगलबार धुलाबारी स्थित मेची उद्योग बाणिज्य संघको सभाहलमा घरेलु तथा साना उद्योग कार्यालयले महिला उद्यमीलाई सीप र उद्योगी, व्यापारीहरुसँग ‘औद्योगिक बाताबरण सुधार : दिगो अर्थतन्त्रको आधार’ विषयमा अन्तरक्रिया समेत गरेको हो ।
कार्यालयले दिवसको अवसरमा विहान पहिलो चरणमा मेचीनगरका महिलाहरुलाई आत्मनिर्भर बन्न मकैको खोसेल्टाबाट आकर्षक व्याज बनाउन सिकाइएको थियो । बाणिज्य संघकी महिला उपाध्यक्ष निर्मला चौहान भण्डारीले इच्छुक सहभागी महिलाहरुलाई व्याज बनाउन सिकाएकी थिइन् ।
दिउँसो दोस्रो चरणमा उद्योगी, व्यापारीहरुसँग ‘औद्योगिक बाताबरण सुधार : दिगो अर्थतन्त्रको आधार’ विषयमा अन्तरक्रिया गरिएको थियो ।
अन्तरक्रिया कार्यक्रममा बाणिज्य संघका संस्थापक अध्यक्ष पन्नालाल जैन, पूर्व महासचिव ध्रुब कनाल, नेपाल भेनियर उत्पादक संघका अध्यक्ष श्याम न्यौपाने, नेपाल ह्याचरी उद्योग संघ केन्द्रीय सदस्य सुवोध निरौला, एनएमसी डेरी उद्योगका प्रतिनिधि नारायण वस्नेत, भानु बहुमुखी सहकारी संस्थाका अध्यक्ष गोपालप्रसाद चुडाल लगायतले उद्योग दर्ता, नविकरण, कर पूँजी वृद्वि, स्थानीय सिफारिस, जेनजी आन्दोलनबाट क्षति, अनलाइन प्रणाली, औद्योगिक क्षेत्र लगायतका समस्याहरुलाई सहज गरिदिन जिल्ला, प्रदेश र केन्द्रमा कुरा उठाइदिन माग गरेका थिए ।
कार्यक्रमकी प्रमुख अतिथि समेत रहेकी घरेलु तथा साना उद्योग कार्यालय प्रमुख पुष्पालता उप्रेतीले पूँजी वृद्वि र उद्योग बन्दका लागि वडाको सिफारिस आवश्यक पर्छ तर, उद्योग नविकरणमा स्थानीयको सिफारिस नचाहिँने बताइन् ।
उनले उद्योगी, व्यापारीहरुको जायज मागहरुलाई नीति निर्माण गर्ने माथिल्लो तहमा पुर्याउ कार्यालयले सहयोगी भूमिका निर्वाह गर्ने बताइन् ।
मेची उद्योग बाणिज्य संघका अध्यक्ष खेमराज प्रसाईको अध्यक्षतामा भएको कार्यक्रमको स्वागत उपाध्यक्ष निर्मला चौहान भण्डारीले तथा सञ्चालन महासचिव दिनेश शाक्य र कार्यकारी प्रमुख गोपाल वस्नेतले संयुक्त रुपमा गरेका थिए ।
Discussion about this post