झापा, ४ माघ । नेकपा एमालेले झापाको पाँच क्षेत्र मध्ये चार वटा निर्वाचन क्षेत्रको उम्मेद्वारको नाम सार्वजनिक गरेको छ ।
केन्द्रीय कमिटीको शनिवार सम्पन्न सचिवालय बैठकबाट चार वटा निर्वाचन क्षेत्रको उम्मेद्वार तय गरेको हो ।
जसमा झापा–१ नं. क्षेत्रबाट रामचन्द्र उप्रेती, झापा–२ बाट देवराज घिमिरे, झापा–४ बाट एलपी साँवा लिम्बू र झापा–५ बाट केपी शर्मा ओली रहेका छन् ।
झापा–४ बाट यसअघि मनोज ताम्लीको नाम उम्मेदवारको लागि आए पनिपछि त्यो नामलाई ब्याक गराएर साँवाको नाम घोषणा गरिएको छ ।
झापा–३ मा पार्टीको उम्मेद्वार तय हुन बाँकी छ । त्यहाँ राप्रपा र एमालेको तालमेल हुन सक्ने सम्भाजना बढेको छ । यसअघिको निर्वाचनमा पनि राप्रपासँग एमालेले चुनावी तालमेल गरेको थियो । आगामी फागुन २१ गते प्रतिनिधि सभा सदस्यको चुनावका लागि उम्मेदवारहरु छान्ने काम सबै दलहरुले धमाधम गरिरहेका छन् ।
उप्रेती सहकारी अभियन्ताको रुपमा परिचित छन् । नेपाल बहुउद्देश्यीय सहकारी संस्था लिमिटेड (एनएमसी) झापाका संस्थापक अध्यक्ष समेत हुन् ।
विगतमा पार्टीको मेचीनगर इन्चार्ज, जिल्ला सदस्य, यसअघि झापा क्षेत्र नं.१ को निर्वाचन परिचालन कमिटी संयोकको भूमिका पनि निर्वाह गरिसकेको पार्टीका पुराना नेता हुन् ।
यसअघि क्षेत्रीय समन्वय कमिटीको बैठकले प्रत्यक्ष तर्फको उम्मेदवारका रुपमा राजु कार्की, लक्ष्मीकुमार राई, घनश्याम अधिकारी, असारु राजवंशी, कृष्ण कनाल, रामचन्द्र उप्रेती, निरु परियार र चन्द्र प्रसाईको नाम सिफारिस गरेको थियो ।
Discussion about this post