‘आचारसंहिता पालना नगरे उम्मेदवार विरुद्ध उजुरी परे कारवाही हुन्छ’

मेचीनगर, १७ माघ । निर्वाचन कार्यालय झापाका प्रमुख निर्वाचन अयुक्त प्रमुख न्यायाधीश उमेशकुमार लुइँटेलले आचारसंहिता पालना नगर्ने उम्मेद्वार विरुद्ध उजुरी परे कारवाही गर्ने बताएका छन् ।

झापा क्षेत्र नम्बर १ स्थित निर्वाचन अधिकृतको कार्यालयमा शुक्रबार सरोकारवालासँगको छलफलमा प्रमुख निर्वाचन अयुक्त लुइँटेलले यस्तो कुरा बताएका हुन् ।

‘मर्यादित, भयरहित र स्वच्छ ढंगले निर्वाचन सफल बनाउन सबैलाई आग्रह छ’, लुइँटेलले भने–‘दलले आचारसंहिता उल्लंघन गर्दै होडिङ बोर्ड, झण्डा र ब्यानर राखेर प्रचारप्रसार कार्यालय राख्न मिल्दैन । तुरुन्त हटाउन पर्छ ।’

आगामी फागुन ४ गतेअघि ब्याच, कार्ड, टोपी, झण्डा छपाई गरेको पाइएमा प्रमाणको आधारमा त्यस्ता छापाखाना सिल गर्नसक्ने सम्मको नियम रहेको बताइएको छ ।

कार्यक्रममा झापाका प्रमुख जिल्ला अधिकारी शिवराम गेलालले आचारसंहिता अनुसार अहिले निर्वाचन सम्बन्धि प्रचारप्रसार, घरदैलो कार्यक्रम गर्न नमिल्ने बताए । उनले झापाका पाँच वटै क्षेत्रका उम्मेदवारहरुलाई आचारसंहिता सम्बन्धी जानकारी गराइएको दावी गरे ।

झापामा शान्तिपूर्ण र भयरहित ढंगले निर्वाचन सम्पन्न गर्नका लागि सुरक्षाकर्मी, कर्मचारी, मतदान स्थालको ब्यवस्थापन लगायतका सबै तयारी पूरा भएको सिडिओ गेलालले बताए ।

कार्यक्रममा निर्वाचन कार्यालय झापाका प्रमुख तुलसी नेपाल, सहायम प्रमुख जिल्ला अधिकारी तेजप्रकाश प्रसाई, जिल्ला प्रहरी कार्यालयका प्रमुख प्रहरी उपरीक्षक बसुन्धरा खड्काले सुरक्षाकर्मीको ब्यवस्थापन तथा सम्पूर्ण तयारी पूरा भएको जानकारी दिएका थिए ।

झापा–१ का निर्वाचन अधिकृत गोपी बिश्वकर्माले आगामी फागुन २१ गते हुने प्रतिनिधि सभा सदस्य निर्वाचनलाई स्वतन्त्र, स्वच्छ, निष्पक्ष, पारदर्शी तथा भयमुक्त बातावरणमा सम्पन्न गर्नका लागि पालना गर्नु पर्ने आचारसंहिता र व्यवस्थापनका विषयमा प्रकाश पारेका थिए ।

कार्यक्रममा झापा–१ का १५ जना उम्मेदवार र त्यसका प्रतिनिधिहरुको सहभागिता रहेको थियो । उनीहरुले आचारसंहिता र व्यवस्थापनका विषयमा जिज्ञासा राखेका थिए ।

निर्वाचन कार्यालय झापाले निर्वाचन आचारसंहिताको बिषयमा उम्मेद्वार र सम्बन्धित दललाई सचेत गराउने उद्देश्यले जिल्लाका पाँच वटै क्षेत्रमा छलफल सुरु गरेको छ । कार्यक्रमको सहजीकरण सहायक निर्वाचन अधिकृत टेकबहादुर श्रेष्ठले गरेका थिए ।