मेचीनगर, ७ फागुन । झापा क्षेत्र नं.१ मा पुराना दलका नयाँ उम्मेदवारहरु र नयाँ दलका पुराना उम्मेदवारहरुबीच कडा प्रतिस्पर्धा हुँदैछ ।
यही फागुन २१ गते हुने प्रतिनिधिसभा सदस्यको चुनावमा झापा–१ मा मुख्य गरेर पुराना दलका नयाँ उम्मेदवारहरु नेकपा एमालेका तर्फबाट रामचन्द्र उप्रेती, नेपाली कांग्रेसका केशबराज पाण्डे रहेका छन् ।
क्षेत्र नं.१ मा विगतको चुनावमा जित्दाको अनुभव हेर्दा २०४८ सालदेखि २०७९ सम्ममा एमाले र कांग्रेस नै अगाडि रहेका छन् । त्यसपछि एमालेसँगको गठबन्धनमा तत्कालिनको नेकपा र माओवादी केन्द्रले दुई पटक जितेको छ ।
त्यस्तै कोशी प्रदेशसभा सदस्यको चुनावमा पनि एकपटक राष्ट्रिय प्रजातन्त्र पार्टी (राप्रपा) ले जितेको छ । यसपटक राप्रपाका तर्फबाट प्रतिनिधिसभा सदस्यको उम्मेदवार नयाँ अनुहारका रुपमा प्रोफेसर हेमराज कार्की छन् ।
यता पुरानै दलभए पनि धेरै वटा पार्टी मिलेर बेनेको नेपाली कम्युनिष्ट पार्टीका तर्फबाट विगतको एमालेबाट फुटेर गएको एकीकृत समाजवादी पार्टीका युवा नेता अशेष घिमिरे उम्मेदवार रहेका छन् ।
यस्तै एकपटक प्रतिनिधिसभा सदस्यको अनुभव बटुलिसकेकी नयाँ दलकी भएपनि पुरानै अनुहारका रुपमा राष्ट्रय स्वतन्त्र पार्टी (रास्वपा) की निशा डाँगी छन् । उनी यसअघि २०७९ को प्रतिनिधिसभा सदस्यमा रास्वपाबाट समानुपातिकबाट सांसद भएकी थिइन् । उनी भद्रपुर निवासी हुन् ।
अर्का नयाँ दलका रुपमा हर्क साम्पाङ राई अध्यक्ष रहेको श्रम संस्कृति पार्टीका तर्फबाट केवलराम राई उम्मेदवार रहेका छन् । यसैगरी नयाँ दलकै रुपमा कुलमान घिसिङको पार्टी उज्यालो नेपाल पार्टीका तर्फबाट नरेशकुमार लावती लगायतका उम्मेदवारहरु चुनावी मैदानमा रहेका छन् ।
समाज रुपान्तरणमा अग्रेणी भूमिका खेलेका सहकारी अभियन्ता एमालेका उम्मेदवार उप्रेतीले सांसदका लागि पहिलो पटक उम्मेदवार बनेकोले क्षेत्र नं.१ का नागरिकहरुलाई विचार पुराएर भोट हाल्न अनुरोध गरेका छन् ।
Discussion about this post