मेचीनगरमा लैङ्गिक हिंसा रोकथामका लागि काठमाडौंमा समीक्षा

मेचीनगर, ६ चैत । मेचीनगर नगरपालिकामा लैङ्गिक हिंसा रोकथामका लागि काठमाडौंमा व्यापक छलफल भएको छ ।

यही चैत ५ र ६ गते काठमाडौंमा महिला, बालबालिका तथा ज्येष्ठ नागरिक मन्त्रालयले आयोजना गरेको सो परियोजना सम्बन्धी योजना तर्जुमा तथा समीक्षा गोष्ठी सम्पन्न भएको हो ।

विश्व बैंकको लगानीमा सो मन्त्रालय मार्फत लैङ्गिक हिंसा रोकथाम तथा प्रतिकार्यको लागि एकीकृत सेवा पहुँच परियोजना देशका ६ वटा पालिकामा सञ्चालन भइरहेको छ ।

सो परियोजना मेचीनगर नगरपालिका, उर्लाबारी नगरपालिका, भोटखोला गाउँपालिका, रामग्राम, धनकुटा र तीलोतमा नगरपालिकामा पाइलट प्रोजेक्टका रुपमा सञ्चालनमा रहेको छ ।

समीक्षा गोष्ठीमा ति पालिकाहरुका उपप्रमुख, महिला, बालबालिका तथा ज्येष्ठ नागरिक शाखा प्रमुख र परियोजनाका विज्ञहरुको सहभागिता रहेको थियो ।

गोष्ठीले समाजमा घुम्ती शिविर, समाज रुपान्तरण, सुरक्षीत स्थान, पीडित महिलाहरूलाई अभियानकर्ताको रूपमा परिचालन गर्न परिवारका सदस्य र आफन्तहरूलाई उत्प्रेरित गर्ने, महिलाको आर्थिक सशक्तीकरणका कार्यक्रम तथा बजेटहरू तय गर्ने, चेतनामूलक कार्यक्रमहरू सञ्चालन गर्न सहयोग पुर्याउन सक्ने छ ।

मेचीनगरकी उपप्रमुख मीना पोखरेल उप्रेतीले यस्ता विषयमा महिला भन्दा पुरुष बढि जिम्मेवार हुनु पर्ने बताइन् । उनका अनुसार नारीमा पुरुषोत्व र पुरुषोत्वमा नारीत्व हुन्छ । दुईदिने कार्यक्रम फलदायी रहेको उनको भनाई छ ।

महिला माथि हुने सामाजिक, सांस्कृतिक, आर्थिक, पारिवारिक, शारीरिक, मानसिक, राजनीतिक तथा यौनजन्य रूपमा भोग्नु परेको हिंसा, जुनसुकै जातजाति, समुदाय र वर्गहरू, ग्रामीण तहदेखि शहरी क्षेत्रमा र तल्लो तहदेखि माथिल्लो निकायसम्म वा सर्वहारा वर्गदेखि सामन्ती, पूँजीपति वर्गका महिला समेत पीडित हुने गरेका छन् ।

परापूर्वकालदेखि चलिआएका रुढिवादी सोच, गलत परम्परा, विभेद लगायत कारण महिलाहरू हिंसामा पर्ने क्रम रोकिएको छैन । त्यसैले महिला समानता र समताको कुरा उठ्न थालेको छ ।

जवरजस्ती करणी, बाल विवाह, बहुविवाह, मानव वेचविखन, अपहरण तथा शरिर बन्धक, गर्भपतन, अप्राकृतिक मैथुन, जातीय छुवाछूत, बोक्सीको आरोप, बाल यौन दुरुपयोग, घरेलु हिंसा, हाडनाता विवाह, अभद्र व्यवहार लगायतका घटना लैङ्गिक हिंसामा पर्दछन् ।

कार्यक्रममा मेचीनगरकी महिला, बालबालिका तथा ज्येष्ठ नागरिक शाखा प्रमुख जयन्ती खरेल, लैङ्गिक हिंसा प्रतिकार्य विज्ञ कमला उप्रेतीको सहभागिता रहेको थियो ।

मेचीनगरमा पनि कोशी प्रदेशको सामाजिक विकास मन्त्रालय, मेचीनगर नगरपालिका र करुणा फाउण्डेशन नेपालको त्रिपक्षीय लागत साझेदारी तथा राष्ट्रिय अपाङ्ग महासंघको प्राविधिक सहयोगमा सञ्चालित अपाङ्गता रोकथाम तथा पुनःस्थापना कार्यक्रम सञ्चालन भइरहेको छ ।

उक्त्त कार्यक्रम सञ्चालनका लागि मेचीनगरमा गतवर्ष ४० लाख, चालु आर्थिक वर्षमा ९६ लाख र आगामी वर्षमा करिव २ करोड ५० लाख बजेट आउने नगरपालिकाले बताएको छ ।