मेचीनगर, २३ वैशाख । बुधबारदेखि चारआलीको सब्जी मण्डी विधिवतरुपमा सञ्चालनमा आएको छ ।
आज विहान पूजा गरेर सब्जी मण्डी सञ्चालन गरिएको हो । सब्जी मण्डीको उद्घाटन मेची उद्योग बाणिज्य संघका वर्तमान अध्यक्ष खेमराज प्रसाईले गरेका थिए ।
उद्घाटन कार्यक्रमका प्रमुख अतिथि प्रसाई, महासचिव दिनेश शाक्य लगायतका व्यवसायीहरुले वषौंदेखि अव्यवस्थित रहेको सब्जी मण्डी अब सबै व्यवसायी र उपभोक्ताहरुलाई राहत मिलेको बताएका छन् । कार्यक्रममा वर्तमान वरिष्ठ उपाध्यक्ष किशोर क्षेत्री (कपिल) लगायत संघका प्रतिनिधिहरूको पनि उपस्थित रहेको थियो ।
मेचीनगर नगरपालिकाले मेचीनगर–१३ स्थित चारआली चौकदेखि दक्षिण भद्रपुर रोड जाने सडकको पुरानो आइतबारे हटियाको १६ कठ्ठा १४ धुर जग्गामा सब्जी मण्डी राख्न बाणिज्य संघलाई सहमति दिएको थियो ।
सब्जी मण्डीमा व्यवसायीहरुको २५ वटा कोठा रहेको छ । बाणिज्य संघ अन्तरगत व्यवसायीले बजार सञ्चालन गर्न नयाँ समिति समेत गठन गरेको छ ।
बाणिज्य संघका वर्तमान कार्यसमिति सदस्य मानबहादुर कटुवालको अध्यक्षतामा ११ सदस्यीय नयाँ समिति गठन गरेको हो । जसको मेचीनगर सब्जी तथा फलफुल व्यवसायी संघ नामाकरण गरिएको छ ।
समितिको उपाध्यक्षमा पूर्णबहादुर नेवार, सचिवमा विजयकुमार चौधरी, सहसचिवमा तिलक श्रेष्ठ र कोषाध्यक्षमा गोमा दंगाल चयन भएका छन् ।
यस्तै, सदस्यहरुमा गंगादेवी भट्टराई, मेनुका काफ्ले, हरि साह, लिलाबहादुर राउत, युवराज पराजुली र सञ्जय साह रहेका छन् ।
यसअघि १४ वर्षदेखि अव्यवस्थित रूपमा मेचीनगर–१२ को चारआली स्थित निजी जग्गामा सब्जी मण्डी सञ्चालनमा रहेको थियो । सब्जी मण्डीमा इलाम लगायतका पहाडी जिल्लाबाट व्यापारीले तरकारी तथा फलफुलहरू ल्याउने गर्दछन् ।
मण्डीमा ल्याइएका सब्जीहरू व्यवसायीहरुले स्थानीय बजार, विराटनगर, इटहरी, धरान लगायत तथा भारतसम्म पठाउने गरेका छन् ।
स्थानीय तरकारीको उत्पादनमा वृद्वि गर्न, प्रोत्साहन गर्न, सुरक्षित, व्यवस्थित तरकारी बजार व्यवस्थापन गर्न, स्थानीय तथा बाहिर उत्पादन गरिएका तरकारीहरुको न्यूनतम मूल्य निर्धारण गरि कृषकको बजारमा पहुँच वृद्वि गर्ने उदेश्य रहेको सचिव चौधरीले बताए ।
नगरपालिकाको सार्वजनिक–निजी साझेदारी कार्यक्रम अन्तरगत बाणिज्य संघले सब्जी मण्डी निर्माण, सञ्चालन तथा व्यवस्थापन गर्न सम्झौता अनुसार नगरपालिकालाई बार्षिक ६ लाख ३५ हजार रूपैयाँ तिर्नु पर्ने छ ।
मेचीनगर सब्जी तथा फलफुल व्यवसायी संघका अध्यक्ष मानबहादुर कटुवालको अध्यक्षतामा सम्पन्न कार्यक्रमको सञ्चालन सहसचिव तिलक श्रेष्ठले गरेका थिए ।
Discussion about this post