अशक्त भएका व्यक्तिहरूको घरैमा डाक्टर गएर स्वास्थ्य जाँच

मेचीनगर, २१ जेठ । मेचीनगर नगरपालिकाले बौद्विक तथा पूर्ण अशक्त भएका व्यक्तिहरूको सुविधाका लागि घरैमा पुगेर स्वास्थ्य उपचार सेवा दिइरहेको छ ।

नगरपालिकाको महिला तथा बालबालिका शाखाले अपाङ्गगता रोकथाम तथा पुर्नस्थापना कार्यक्रम अन्तरगत बौद्विक तथा पूर्ण अशक्त भएका व्यक्तिहरूलाई घर–घरमा गएर स्वास्थ्य चेकजाँच र परिचय कार्डको पहुँच बढाइएको हो ।

महिला तथा बालबालिका शाखा प्रमुख जयन्ती खरेलले घर–घर गएर बौद्विक तथा पूर्ण अशक्त भएका व्यक्तिहरूको गृह भेटद्वारा स्वास्थ्य चेकचाँज तथा परिचय पत्रमा पहुँच पुर्याउने उदेश्यले विहीबारदेखि मेचीनगरका १५ वटै वडामा अभियान सुरु गरिएको जानकारी दिइन् ।

आज मेचीनगर–४, ५, ६, ७, ११ र १५ नम्बर वडाका ११ जना पूर्ण अशक्तहरुलाई सो उपचार सेवा प्रदान गरिएको छ । त्यस्तै बुधबार सम्भावित अपाङ्ग भएका व्यक्तिहरूको स्वास्थ्य चेकचाँज तथा परिचय पत्रमा पहुँच बढाउने लक्ष्यसहित नगरपालिकाको सभा हलमा आयोजित स्वास्थ्य उपचार सेवामा १३ जना सहभागी भएको करुणा फाउण्डेशन नेपालका मेचीनगर संयोजक पदम बराइली बताए ।

स्वास्थ्य जाँच गरेका १३ जना मध्ये ७ जनाले अपाङगता परिचय पत्र पाउने प्रक्रियामा रहेको उनको भनाई छ । ७ जना मध्ये रातो कार्ड पाउने २ जना, निलो २ जनाले, पहेलो २ जनाले र सेतो १ जनाले पाउने भएका हुन् ।

मेचीनगर आधारभूत अस्पताल धुलाबारीका डाः प्रकाशचन्द्र गच्छदार, कर्मचारी खगेन्द्र खतिवडा (लेलिन) लगायत स्वास्थ्यकर्मीहरुले स्वास्थ्य उपचार सेवा दिएका थिए । पूर्ण अशक्त भएका व्यक्तिहरूको स्वास्थ्य उपचार सेवा सँगसँगै गृहभेटमा नगरउपप्रमुख मीना पोखरेल उप्रेती, महिला तथा बालबालिका शाखा प्रमुख खरेल, सम्बन्धीत वडाका वडाध्यक्ष, वडा सदस्यहरु लगायतको उपस्थिति रहेको थियो ।

संयोजक बराइलीका अनुसार सो कार्यक्रम सञ्चालनदेखि हालसम्म अशक्त भएका व्यक्तिहरूको संख्या १७८५ जना रहेको छ । तिमध्ये रातो कार्ड पाउने ५१०, निलो पाउने ६६९, पँहेलो पाउने ४९६ र सेतो कार्ड पाउने ८७ जना रहेका छन् भने २४ जनाको कार्ड पाउने प्रक्रियामा रहेको उनको भनाई छ ।

मेचीनगर नगरपालिका, कोशी प्रदेश सरकारको सामाजिक विकास मन्त्रालय र करुणा फाउण्डेशन नेपालको त्रिपक्षिय लागत साझेदारी तथा राष्ट्रिय अपाङ्ग महासंघको प्राविधिक सहयोगमा अपाङ्गता रोकथाम तथा पुर्नस्थापना कार्यक्रम सञ्चालनमा रहेको छ ।