झापा, २४ जेठ । राष्ट्रिय स्वतन्त्र पार्टी (रास्वपा) झापाकाे सभापतिमा ओमनाथ भण्डारी निर्वाचित भएका छन् ।
शनिबार बिर्तामाेडमा भएको प्रथम जिल्ला अधिवेशनले प्रतिस्पर्धीहरू लक्ष्मण बस्नेत र अर्जुनकुमार मैनालीलाई पछि पार्दै भण्डारी अध्यक्षमा निर्वाचित भएका हुन् ।
निर्वाचनमा ६५० मत खसेको थियोे । जसमा भण्डारीले ३४१ मत प्राप्त गरेर विजयी भएका हुन् ।
प्रतिस्पर्धी बस्नेतले २४७ र मैनाली २५ मत मात्रै प्राप्त गरेका थिए । अधिवेशनले जिल्ला उपसभापतिमा पुष्पलाल ढकालले २१० मत ल्याएर विजयी भए ।
उनका प्रतिस्पर्धीहरू शान्ता तामाङले १९८ र लीला खड्काले १११ मत मात्र ल्याए । सचिवमा विरोध सुवेदीले ३६८ मतसहित विजयी भए । उनका प्रतिस्पर्धी रविन खड्काले २३५ मत ल्याएका थिए ।
सहसचिवमा भीमबहादुर कुँवरले ३५२ मत ल्याएर विजयी भए । उनका प्रतिस्पर्धीहरू राजेन्द्र बरालले १९३ र लक्ष्मी रेग्मीले ७४ मत मात्र पाएका थिए ।
कार्यसमिति सदस्यमा डिल्ली न्याैपाने, शान्तिमाया न्याैपाने लगायत विजयी भएका छन् ।
त्यस्तै,पार्टीको झापा क्षेत्र नम्बर १ काे सभापतिमा १०८ मत ल्याएर कमल गौतम, क्षेत्रीय सचिवमा ज्ञाननाथ गाैतम विजयी भएका छन् ।
झापा-३ मा कमल बानियाँ ४८ मत र झापा- ५ मा चुडामणि पाठक ५३ मतसहित क्षेत्रीय सभापतिमा निर्वाचित भएका छन् ।
यस्तै, झापा-२ मा गोपाल कटुवाल र झापा-४ मा लीलामाया बस्नेत सभापतिमा निर्विरोध निर्वाचित भएका थिए ।
अधिवेशन स्थलमा प्रतिनिधिको विषयलाई लिएर केहीबेर घम्सा घम्सीसमेत भएको थियोे ।
Discussion about this post