चिया बगान मालिकलाई प्रहरीले भन्याे-´दशगजा खाली राख्न बालेन सरकारकाे निर्देशन छ`

पाठामारी, ३० जेठ ।  झापाका प्रमुख जिल्ला अधिकारी शिवराम गेलाल (सीडीओ) ले माथिकाे परिपत्र अनुसार नेपाल-भारतकाे दशगजा खाली राख्नु पर्ने बताएका छन् ।

साेही निर्णय अनुसार शुक्रबार कचनकवल गाउँपालिका-५ पाठामारी स्थित नेपाल-भारत सीमा क्षेत्र दशगजामा लगाइएको चिया बगान दुवै देशको संयुक्त सीमा सुरक्षा गस्ती टोलीले हटाएको छ ।

गस्ती टाेलीले सुनकाेशी चिया बगानका करिव ६५ वटा बाेटहरू काटेर फालेकाे जिल्ला प्रहरी कार्यालय झापाका सूचना अधिकारी विजय चाैहानले जानकारी दिए ।

तर, स्थानीयले चिया बगानका मालिक ज्ञाने चाेकका दिलबहादुर थेवेकाे करिव १२३ वटा चियाका बुट्टा काटेर नष्ट गरेकाे बताएका छन् ।

११४ नम्बर सीमा स्तम्भ नजिक दशगजामा सुनकोशी चिया बगान क्षेत्र पर्दछ ।

दशगजा क्षेत्र खाली छाड्नुपर्ने भएकाले सो क्षेत्रमा लगाइएको चियाको बोट हटाइएको सूचना अधिकारीले चाैहानकाे भनाई छ ।

बगानका मालिक थेवेले सशस्त्र प्रहरीका एक जना अधिकारीले फाेन गरेर चियाका केही बाेटहरू दशगजा क्षेत्रमा पर्ने भएकोले हटाइएकाे जानकारी गराएकाे बताए ।

उनले भने-´यत्रो वर्ष हटाइएन, अहिले केले बाधा परेछ भनेर प्रहरीलाई साेधे । प्रहरीकाे जवाफ बालेन सरकारकाे निर्देशन त्यस्तै छ ।`

दशगजा क्षेत्र खाली गराउन नेपाल प्रहरी, सशस्त्र प्रहरी बल र भारतीय सीमा सुरक्षा बल (एसएसबी)को संयुक्त गस्ती टोली खटिएको  थियो ।

यसैबीच, शुक्रबारै बिर्तामोडमा नेपाल र भारतको सीमा सम्बन्धी द्विपक्षीय फिल्ड सर्भे बैठक पनि सम्पन्न भएको छ ।

अन्तरास्ट्रिय सीमा सिदान्त अनुसार मुख्य सीमास्तम्भ (जंगे पिलर) रहेकाे स्थानदेखि ३० मिटर (नेपाल र भारत) तर्फकाे  क्षेत्रलाई दशगजा (नाे मेन्स ल्याण्ड) भनिन्छ ।