मेचीनगर, १७ साउन । चारआली जेसीजको आयोजनामा नेपाल जेसीज क्षेत्र ‘क’ सम्मेलन हुने भएको छ ।
आगामी असोज ९ र १० गते चारआली जेसीजको आतिथ्यमा चारआलीमा क्षेत्रिय ‘क’ सम्मेलन हुने भएको हो ।
चारआली जेसीजले शनिबार सम्मेलनको तयारी, उद्देश्य, कार्यक्रम र अनमानित लाग्ने बजेटका विषयमा पत्रकार सम्मेलन गरेर सार्वजनिक गरेको छ ।
सम्मेलन निर्देशक उत्तमप्रसाद पकुवालले असोज ९ र १० गते क्षेत्र ‘क’ अन्तरगतका ४८ वटा जेसीज शाखा र करिव एक हजार युवाको सहभागितामा सम्मेलन गरिने जानकारी गराए । उक्त सम्मेलनले युवाको नेतृत्व विकास, उद्यमशीलता, सामाजिक उत्तरदायित्व, स्थानीय पर्यटन प्रवद्र्धन र व्यवसायमा टेवा पुग्ने विश्वास व्यक्त गरेको छ ।
सम्मेलनको राष्ट्रिय नारा एम्स, एक्ट र एचिभ रहनेछ । सम्मेलन अन्तरगत अन्तरशाखा वक्तृत्वकला प्रतियोगिता, ‘प्रोजेक्ट संकल्प’ विषयक सेमिनार, सांस्कृतिक कार्यक्रम तथा स्थानीय उत्पादन र झाँकीहरुको प्रदर्शनी लगायतका कार्यक्रम सञ्चालन गरिने आयोजकको भनाई छ ।
सम्मेलनका लागि ४० लाख रुपैयाँको अनुमानित बजेट तय गरिएको छ । बजेटमध्ये १३ लाख रुपैयाँ दर्ता शुल्कबाट, ५ लाख संघीय तथा प्रदेश सरकारबाट, १० लाख स्थानीय सरकारहरुबाट र १२ लाख प्रायोजक तथा सहयोगी संस्थाबाट जुटाइने लक्ष्य राखिएको छ ।
त्यस्तै खर्चतर्फ अतिथि सत्कार तथा भोजनमा १२ लाख, प्रविधि तथा अडियो–भिजुअल व्यवस्थापनमा ६ लाख, भौतिक पूर्वाधारमा ४ लाख ५० हजार, प्रचार–प्रसारमा ३ लाख, मायाको चिनो तथा सम्मानमा ३ लाख, प्रशिक्षण तथा वक्ता व्यवस्थापनमा ३ लाख ५० हजार, सुरक्षा तथा स्वयमसेवक व्यवस्थापनमा ३ लाख, सांस्कृतिक कार्यक्रमका लागि २ लाख र विविध प्रशासनिक खर्चमा ३ लाख रुपैयाँ राखिएको छ ।
पत्रकार सम्मेलनकी प्रमुख अतिथि कोशी प्रदेश सांसद सबिना बजगाईले आफ्नै क्षेत्र र घर आगनमा हुन लागेको सम्मेलनमा मैले सक्ने सहयोग रहने बताइन् । उनले युवाको नेतृत्व विकास र सामाजिक रूपान्तरणमा जेसीजको भूमिका महत्वपूर्ण रहेको दावी गरिन् ।
कार्यक्रममा नेपाल जेसीजका केन्द्रीय कार्यकारिणी उपाध्यक्ष योगेश राजबंशी, चारआली जेसीजका संस्थापक अध्यक्ष विष्णु रिमाल, धुलाबारी जेसीजका पूर्व अध्यक्ष विपुल श्रेष्ठ, मेची उद्योग वाणिज्य संघका महासचिव ध्रुव कनाल लगायतले सम्मेलन भव्य रुपमा सफल पार्न सबै क्षेत्रबाट साथ र सहयोगको आवश्यक रहेको बताए ।
चारआली जेसीजका अध्यक्ष सञ्जय निरौलाको अध्यक्षतामा सम्पन्न पत्रकार सम्मेलनमा सचिवालयको उद्घाटन र लोगो समेत सार्वजनिक गरिएको थियो । कार्यक्रमको सञ्चालन चारआली जेसीजका पूर्व अध्यक्ष बिरु वेघाले र जेसिज आस्थावाचन उत्सव भट्टराईले गरेका थिए ।
चारआली जेसीजका अध्यक्ष निरौलाले यो सम्मेलन चारआलीका लागि एतिहासिक भएकाले प्रत्येक घर र पसलका नागरिकहरुले सम्मेलनका दिन आफ्नो स्थानमा पाहुनालाई फुल र घडाले स्वागतसहित साँझ दिपावाली गरेर झिलिमिलि पार्न अनुरोध गरेका छन् ।
त्यस्तै अपठ्यारो परेका अतिथिहरुलाई घर र पसलका स्थानीय नागरिकहरुले शौचालय प्रयोग गर्न दिनसमेत अध्यक्ष निरौलाले आग्रह गरे ।
Discussion about this post