पत्रकार महासंघ झापा शाखाको पद हस्तान्तरण

बिर्तामोड, ९ पुस । आज स्थापना दिवसमा नेपाल पत्रकार महासंघ झापा शाखाको जिल्ला कार्यसमिति, प्रदेश र राष्ट्रिय परिषद सदस्यमा निर्वाचितहरुको पद हस्तान्तरण कार्यक्रम सम्पन्न भएको छ ।

आज नेपाल पत्रकार महासंघ झापा शाखाको ३६ औँ स्थापना दिवसको अवसरमा बिर्तामोड स्थित ईन्द्रेणी पार्टी प्यालेसमा आयोजित निर्वाचितहरुको १४ औँ पद हस्तान्तरण कार्यक्रम सम्पन्न भएको हो ।

पद हस्तान्तरण कार्यक्रममा सञ्चारकर्मी डायरी विमोचन गरिएको छ । कार्यक्रममा निर्वाचन समितिका संयोजक शिरो सान्दाई खतिवडा, निर्वाचन अधिकृत अधिवक्ता दीपेन्द्र भट्टराई, निर्वाचन अधिकृत लक्ष्मी खनाल कोइरालाले निर्वाचित महासंघको कार्यसमिति, प्रदेश र राष्ट्रिय परिषद सदस्यहरुलाई पद हस्तान्तरणसँगै प्रमाणपत्र वितरण गरेका थिए ।

सोही अवसरमा महासंघको अघिल्लो कार्यकालमा उत्कृष्ट शाखा बनाउन प्राविधिक सहयोग गर्ने सन्तोष शर्मा, सन्तोष अधिकारी, रुपा मुखिया र महासंघकी कर्मचारी अनुषा चुडाललाई सम्मान गरिएको थियो ।

कार्यक्रममा प्रमुख अतिथि पत्रकार महासंघका पूर्व महासचिव चन्द्र भण्डारी, अग्रज पत्रकार गोविन्दचन्द क्षेत्री, नेपाल प्रेस काउन्सिलका सदस्य गणेश पोखरेल, महासंघ कोशी प्रदेशकी उपाध्यक्ष अम्बिका भण्डारी, प्रेस सेन्टरका नेता बिमल लामिछाने, फोनिजका नेता दिपिन राई, पत्रकार राजेन्द्र गौतम, प्रेस युनियन झापाका अध्यक्ष गिरीराज भट्टराई, प्रेस चौतारीका उपाध्यक्ष प्रदीप परियार, समाजवादी प्रेस संगठनका अध्यक्ष शम्भुजित दाहाल, सञ्चारिका समूहकी अध्यक्ष लिला अनमोल लगायतले शुभकामना मन्तव्य व्यक्त गरेका थिए ।

कार्यक्रममा निर्वाचन समितिले महासंघ झापाको सचिव पदमा बराबरी मत प्राप्त गर्ने प्रदीप परियार र राजु पाठकबीच आधा–आधा कार्यकालका लागि गोलाप्रथा गरेको थियो ।

गोलाप्रथाबाट पहिलो आधा अर्थात ढेड वर्षे कार्यकालका लागि राजु पाठक र बाँकी कार्यकालका लागि प्रदीप परियार रहने गरी जिम्मेवारी प्रदान गरिएको छ ।

गत मंसिर २८ गते सम्पन्न महासंघको निर्वाचनबाट आगामी तीन बर्षे कार्यकालका लागि पुनः एकराज गिरीकै नेतृत्वमा नयाँ कार्य समिति निर्वाचित भएको छ ।

पत्रकार महासंघ झापा शाखाका अध्यक्ष एकराज गिरीको अध्यक्षतामा सम्पन्न कार्यक्रमको स्वागत उपाध्यक्ष केशव भट्टराईले र सञ्चालन सचिव डिकेश लामाले गरेका थिए ।