धार्मिक–पर्यटकीय स्थलको विकासका लागि प्रोजेक्ट आवश्यक : नगरप्रमुख बुढाथोकी

मेचीनगर, १३ साउन । आज नाग पञ्चमी । नाग पञ्चमीका अवसरमा मेचीनगर–१, देवीगंज स्थित मनसा नाग देवी ४९ धारा ऐतिहासिक पर्यटकीय धार्मिक तिर्थ स्थल हिले सिमसार क्षेत्रमा आइतबारदेखि नाग पञ्चमी विशेष त्रिदिवशिय धार्मिक तथा सांस्कृतिक महोत्सव भइरहेको छ । आज महोत्सव समापन हुँदैछ ।

४९ धारा मनसादेवी हिले सिमसार धार्मिक तथा पर्यटकीय स्थल संरक्षण समितिका अध्यक्ष महेन्द्र मल्लका अनुसार पहिलो दिन साकेला नृत्य विभिन्न जातजातिका झाँकी, लाखेनाँच, च्याबु्रङ्नाच, भजन किर्तन, सांगीतिक नृत्यहरु प्रस्तुत गरिएको थियो ।

साउन १२ गते सोमबार पूजाअर्चना, विद्यालय स्तरीय कार्यक्रम, ख्याती प्राप्त र स्थानीय बाल कलाकारहरुको सांगीतिक प्रस्तुति रहेको थियो ।

आज नाग पञ्चमीको अवसरमा नाग पञ्चमीको पूजा अर्चना, काल सर्प योग निवारणका लागि होमादी, भजन किर्तन गरिने उनको जानकारी दिए ।

दोस्रो दिनको कार्यक्रमका प्रमुख अतिथि मेचीनगर नगरपालिकाका प्रमुख गोपालचन्द्र बुढाथोकीले धार्मिक तथा पर्यटकीय स्थलको विकासका लागि प्रोजेक्ट बनाएर लाग्नु पर्ने बताएका छन् ।

‘धार्मिक संरक्षणका लागि सबैको सहिष्णुता छ’, नगरप्रमुख बुढाथोकीले भने–‘बहुधार्मिक, बहुजाति र बहुभाषिक भएको देशमा यस्ता पवित्रस्थलहरुले पर्यटकीय क्षेत्रको रुपमा विकास गर्न सके विश्वका नागरिकहरु आउने वातावरण बन्छ । एउटा भूगोलमा एउटा धार्मिक पर्यटन केन्द्र बनाउनु पर्छ ।’ उनले मेचीनगरमा केहि भएको छैन भन्नेहरुले वडा नम्बर १ र ४ का केहि क्षेत्र मात्रै हेरेपनि पुग्ने बताए ।

कार्यक्रममा पर्यटन कार्यालय काँकरभिट्टाका प्रमुख छविलाल खतिवडाले पर्यटन प्रर्वद्धनका लागि धार्मिक तथा सिमसार क्षेत्रको दिगो विकासमा पर्यापर्यटनलाई जोड्न सकिने बताए । कार्यक्रममा मेचीनगर–४ नम्बर वडाका वडाध्यक्ष अर्जुनकुमार कार्की लगायतले शुभकामना मन्तव्य व्यक्त गरेका थिए ।

कार्यक्रममा स्वागत मन्तव्यमा वडा नम्बर १ का पूर्व वडा अध्यक्ष ४९ धारा मनसादेवी हिले सिमसार धार्मिक तथा पर्यटकीय स्थल संरक्षणका प्रस्तावक पासाङ तामाङले साविकको वडा नम्बर ७, ८ र ९ नम्बरलाई समेटेर बनिएको वडा नम्बर १ मा धार्मिक तथा पर्यटन विकासको प्रचुर सम्भावना बोकेको क्षेत्र रहेको बताए ।

‘सुरुमा ४५ धाराको कल्पना गरिएको थियो’, समितिका सल्लाहकार तामाङले भने–‘पछि ४९ धारा बनाइयो । यसलाई पछि फेरि ५५ धारा बनाउने सोच छ ।’

कृष्णथुम्की धार्मिक तथा ऐतिहासिक पर्यटन क्षेत्र विकास समितिका अध्यक्ष समेत रहिसकेका अध्यक्ष मल्लका अनुसार यहाँ मच्छ्य देवताको वासस्थान छ । ६३ सालतिर अनौठो खालको माछा भेटिएको थियो । माछा भेटिएको कुवा छ । माछा स्थानीयले समातेर घर लगे तर अनौठो प्रकृतिको भएकोले कसैले खाने आँट गरेनन् ।

जसले समातेर लग्यो उसको परिवारमा सानो नानी विरामी परे । त्यसपछि धामी बिजुवालाई देखाउँदा कुवाबाट ल्याएको उक्त बस्तु तत्काल सोही कुवामा फर्काएर दुध चडाए धुप बात्ती गरे ठिक हुने बिजुवाले बताएसँगै सोही अनुसार माछा कुवामै लगेर छोडिएको थियो ।

पूजा आजा गरेर दुध चढाएपछि सानो नानी पूर्ण रुपमा ठिक भएका थिए । सो घट्नापछि सो क्षेत्रमा धार्मिक आस्था र विश्वास बढेको मल्लको भनाई छ ।

स्थानीय समाजसेवी डिकेन्द्र थापाले १ कठ्ठा, चन्द्र थापाले १ कठ्ठा र गोविन्द राईका परिवारले १ कठ्ठा गरी जम्मा तीन कठ्ठा जग्गा दिएपछि धार्मिक तथा पर्यटन क्षेत्रको स्थापना गरिएको छ ।

कार्यक्रममा जग्गादाता, कलाकार, धार्मिक क्षेत्रमा सहयोग पुर्याउने र योगदान दिने एकदर्जन बढीलाई सम्मान गरिएको थियो ।
धार्मिक महोत्सवको सहजीकरण जग्गा दाता, पूर्व वडा सदस्य एवम् समितिका सल्लाहकार सचिव डिकेन्द्र थापाले गरिरहेका छन् ।