एमालेको गढमा एसका नेताले बनको अध्यक्षमा जितेपछि खैलाबैला

भद्रपुर, २ मङ्सिर । नेकपा एमालेको किल्लामा नेकपा एकीकृत समाजबादीका नेताले सामुदायिक बनको चुनाव जितेपछि राजनीतिक वृत्तमा चर्चा चुलिएको छ ।

नगर प्रमुख र उपप्रमुखसहित बहुमत वडामा नेकपा एमालेले स्थानीय चुनाव जितेको भद्रपुर नगरपालिकाको वडा नं. ९ र १० मा रहेको चन्द्रगढी सामुदायिक बनको चुनावमा नेकपा एकीकृत समाजबादीका प्रदेश कमिटी सदस्य दुर्गाप्रसाद भट्टराई अध्यक्ष पदमा बिजयी भएका छन् ।

२२९० मतदाता रहेको सो बनको मङ्गलबार सम्पन्न चुनावमा एकीकृत समाजबादीका भट्टराईले नेकपा एमालेका उम्मेद्वार चुडामणि मैनालीलाई अध्यक्ष पदमा पराजित गरे ।

बिजयी भएका भट्टराईले ९७५ मत प्राप्त गरे भने उपबिजयी मैनालीले ८३६ मत प्राप्त गरे । मैनाली नेकपा एमालेको भद्रपुर नगर कमिटीका सदस्य तथा बन समितिका पूर्व उपाध्यक्ष हुन् ।

बाहिरबाट हेर्दा नेकपा एमालेबाट विभाजित भएर बनेको नेकपा एकीकृत समाजबादीका नेताले चुनाव जितेको घटना आश्चर्यजनक लागे पनि स्थानीय परिवेशमा भने यसलाई सामान्य रुपमा नै लिइएको छ ।

नेकपा एमालेबाटै तत्कालीन चन्द्रगढी गाउँ विकास समितिको अध्यक्ष भइसकेका भट्टराई संविधानसभाको चुनावदेखि एमालेबाट टाढिएका थिए । गत नगरपालिका चुनावमा उनी स्वतन्त्र उम्मेद्वारको रुपमा मेयर पदको उम्मेद्वार बनेका थिए । तर उनी पार्टी नेतृत्वमा रहँदा र नरहँदाको जुनसुकै अवस्थामा सामाजिक रुपमा भने लोकप्रिय रहँदै आएका छन् ।

बनको चुनावमा लोकप्रिय उम्मेद्वार र बलियो गठबन्धनका कारण उनले चुनाव जितेका हुन् । नेकपा एकीकृत समाजबादीको नेतृत्वको गठबन्धनमा नेपाली कांग्रेस र नेकपा माओबादी केन्द्र सामेल थियो । अर्कातिर नेकपा एमालेको नेतृत्वमा बनेको गठबन्धनमा राप्रपा सामेल थियो ।

इतिहासतिर फर्किने हो भने चन्द्रगढी सामुदायिक बनको अवधारणा, स्थापना र सञ्चालनमा जहिल्यै दुर्गा भट्टराईको भूमिका नेतृत्वदायी रह्यो । २०५४ साल असोज २१ गते बनको स्थापना भयो र यसले कानूनी मान्यता २०६६ मा प्राप्त गरेको थियो ।

स्थापनाकालदेखि एक कार्यकाल बाहेक सबै अवधिमा भट्टराई नै अध्यक्ष रहँदै आएका छन् । यस अघि एकपटक चुनाव भएको थियो । जसमा नेकपा एमालेका नेता हिरा पोखरेल अध्यक्षमा निर्वाचित भएका थिए ।

२२ वर्ष अध्यक्ष रहिसकेका भट्टराईले उपभोक्ताको मन जितेको पुष्टि भएको छ । उपभोक्ताहरु उनी नभई बन समिति राम्रो चल्न सक्दैन भन्ने मान्यता राख्छन् ।
यसरी समर्थन पाएका उनी अहिलेको अप्ठेरो राजनीतिक अवस्थामा पनि एकीकृत समाजबादीको नेतृत्वमा गठबन्धन बनाएर अध्यक्ष पदमा बिजयी बन्न सफल भए । नेकपा एमालेका लागि चन्द्रगढी सामुदायिक बनको चुनाव धक्का सावित भएको छ ।

गठबन्धनमा सामेल राप्रपाका तर्फबाट उपाध्यक्ष र सहसचिव जस्ता महत्वपूर्ण पदका उम्मेद्वार बिजयी बनेका छन् । दलित, जनजाति, अपांग र आदिबासीको आरक्षित सिटमा भने नेकपा एमालेका उम्मेद्वारले जितेका छन् ।

मतदाताले पार्टीभन्दा व्यक्ति हेरेर मतदान गरेको हुँदा परिणाम मिश्रित र अध्यक्षमा भट्टराईको जित भएको विश्लेषण गरिएको छ ।