बाहुनडाँगीका स्थानीय भन्छन्-´हात्तीलाई रवरकाे गाेली हान`

मेचीनगर, ८ असार । बाहुनडाँगीका हात्ती पीडितहरूकाे एउटै स्वार छ- ´बाच्न दे सरकार ।`

हात्तीबाट आजित बनेका पीडित स्थानीयहरू सरकारकाे ध्यानाकर्षण गराउन हस्ताक्षर संकलन गर्न थालेका हुन् ।
असार १० गतेसम्म २० हजार हस्ताक्षर संकलन गरेर झापाका प्रमुख जिल्ला अधिकारी मार्फत प्रधानमन्त्रीलाई बुझाउने कार्यक्रम रहेकाे छ ।

हस्ताक्षर संकलन अभियानका संयाेजक सन्ताेष सुवेदीले अब पनि सरकारले वैकल्पिक उपायहरू अपनाएर भने मार्ने र मर्नेकाे विकल्प नरहेकाे बताए ।

उनका अनुसार पहिलाे चरणमा हस्ताक्षर संकलन बुझाएपछि दाेस्राे चरणदेखि अलिक सशक्त हुन्छ ।

बाहुनडाँगी लगायत मुख्य सडकहरूमा हात्ती पीडित लम्पसार पर्ने उनकाे भनाई छ ।

´बाच्न दे सरकार भनेर १० हजार बढी हस्ताक्षर संकलन गरिसक्याे`-सुवेदीले भने-´अब चाँडै सीडीओ मार्फत प्रधानमन्त्रीलाई पठाउँछाैं । बाच्न पाउने अधिकार सबैकाे हुन्छ । अभियान अब सशक्त बन्छ ।`

बाहुनडाँगी क्षेत्रमा लामाे समयदेखि हात्ती सम्बन्धि काम गरिरहेकाे संस्था मानव हात्ती द्वन्द व्यवस्थापन तथा वातावरण संरक्षण मञ्चका अध्यक्ष हरिप्रसाद उप्रेतीले हात्तीलाई केही गर्दा पनि छेक्न र राेक्न नसकिएको बताए ।

संयाेजक सुवेदी, अध्यक्ष उप्रेती, समाजसेवी एवम् हात्ती पीडित सनत अधिकारी, सम्भु कार्की, कुबेर भण्डारी लगायत स्थानीयहरू हात्तीकाे विकल्प अब रवरकाे गाेली प्रयाेग नै हाे ।

हात्ती प्रभावित क्षेत्रमा टाक्स फाेर्सकाे नाममा १० जना सशस्त्र प्रहरी ल्याएर केही नहुने उनीहरूकाे भनाई छ ।

सुरक्षाकर्मीहरूलाई उपकरणसहित फिल्डमा खटाउन स्थानीयकाे माग छ ।