सभापतिका उम्मेद्वार कट्टेललाई शर्मा र थेबेलाई सिटौलाको साथ

झापा, ४ मंसिर । राजनीतिक दृष्टिले महत्वपूर्ण मानिएको जिल्लामा नेपाली कांग्रेसको सभापति पदमा राम कट्टेल र देउमान थेबेबीच प्रतिष्पर्धा हुने भएको छ ।

पार्टीको १४ औं राष्ट्रिय महाधिवेशनको सन्दर्भमा उपसभापति कट्टेल र पूर्व उपसभापति थेबेले जिल्ला सभापति पदको उम्मेद्वार बन्ने घोषणा गरेर कार्यकर्तासँग मत माग्न थालिसकेका छन् ।

दुबै उम्मेद्वारलाई जिताउन केन्द्रीय नेता तथा स्थानीय कार्यकर्ता दुई खेमामा विभाजित छन् भने अलग अलग प्रचार समिति गठन गरिएका छन् ।

झापामा पाँच वटा निर्वाचन क्षेत्र, १० वटा प्रदेश निर्वाचन क्षेत्र र १५ पालिका रहेका छन् । अहिलेदेखि नै गाउँ गाउँमा दुबै उम्मेद्वारले समूह बनाएर आफ्ना नीति, कार्यक्रम र धारणा कार्यकर्ता माझ पुर्याउन थालिसकेका छन् ।

पार्टीको राष्ट्रिय राजनीतिमा सभापति शेरबहादुर देउवा, वरिष्ठ नेता रामचन्द्र पौडेल लगायतका नेताको नेतृत्वमा अलग अलग खेमा भए तापनि झापामा पार्टीका प्रवक्ता विश्वप्रकाश शर्मा र पूर्व महामन्त्री कृष्णप्रसाद सिटौलाको नेतृत्वमा खेमा बनेको छ ।

सभापतिका उम्मेद्वार राम कट्टेललाई प्रवक्ता शर्मा र देउमान थेबेलाई पूर्व महामन्त्री सिटौलाको खुला समर्थन रहेको छ ।

पार्टीका जिल्ला सभापति उद्धव थापा, पूर्व सांसद्हरु सुधिरकुमार शिवाकोटी, केशवकुमार बुढाथोकी, प्रचार विभागका प्रमुख कृष्ण हुमागाई थेबेको पक्षमा मत माग्ने अभियानमा सहभागी छन् ।

त्यसैगरी, सभापतिका अर्का उम्मेद्वार राम कट्टेललाई जिताउन धुलावारी क्याम्पसका प्रमुख एवम् बौद्धिक व्यक्तित्व पुष्पराज पौडेलको संयोजकत्वमा राम कट्टेल जिताउ अभियान समिति गठन भएको छ ।

संविधान सभा सदस्य उषा गुरुङ, जिल्ला समितिका सचिवद्वय ताराबीर कटुवाल र प्रेम सम्बाहाम्फे, नेपाल शिक्षक महासंघका पूर्व जिल्ला अध्यक्ष तेजप्रसाद चौलागाई, जिल्ला प्रवक्ता लोकराज ढकाल लगायतका नेताहरु कट्टेलको पक्षमा खुलेर मत मागिरहेका छन् ।
प्रमुख विपक्षी दल नेकपा एमालेका अध्यक्ष केपी ओलीको गृहजिल्ला झापामा नेपाली कांग्रेसको नेतृत्वको बागडोर कसले लिन्छ भन्ने विषय राष्ट्रिय राजनीतिमा समेत चासोपूर्वक हेरिएको छ ।

पार्टीको केन्द्रीय सभापति पदमा उम्मेद्वार बन्ने चर्चामा रहनु भएको पूर्व महामन्त्री सिटौला र यही महाधिवेशनमा महामन्त्रीको उम्मेद्वारी घोषणा गरिसकेका प्रवक्ता शर्माको शक्ति परीक्षणका लागि समेत जिल्लाको पार्टी चुनाव महत्वपूर्ण मानिएको छ ।

भद्र सहमतिको विवाद

पार्टीको १३ औं महाधिवेशनका बेला जिल्ला सभापति पदमा अहिलेका उम्मेद्वार देउमान थेबे र अहिलेका सभापति उद्धव थापाबीच प्रतिष्पर्धाको माहौल थियो ।

तर नेताहरु सिटौला र शर्माबीचको सहमतिमा उद्धव थापालाई त्यसबेला सर्वसम्मत सभापति चयन गरिएको थियो । नौ बुँदे सहमति पत्र तयार पारेर उपसभापति, सचिव, सहसचिव र कोषाध्यक्ष लगायतका पदमा भागबण्डा गरिएको थियो ।

सहमतिको कुनै पनि बुँदामा नलेखिए पनि १४ औं महाधिवेशनमा थेबेलाई सर्वसम्मत सभापति बनाउने विषयमा भद्र सहमति भएको थेबे पक्षधरको दावी छ ।

थेबे पक्षधरले भद्र सहमतिको पालना गर्न कट्टेल पक्षलाई दवाव दिइरहेको समेत छ । तर, थेबेलाई सभापति पदमा सर्वसम्मत बनाउने भनेर कुनै सहमति नभएको कट्टेल पक्षको भनाई छ ।

१३ औं महाधिवेशनमा सभापति पद सर्वसम्मत गराउन उम्मेद्वारी त्याग गरेको विषयमा उच्च मूल्यांकन गर्दै नौ बुँदे सहमतिको पहिलो बुँदामा थेबेको राजनीतिक भूमिकालाई सम्बद्र्धन गरिने उल्लेख छ ।

यही बुँदाका विषयमा दुबै खेमाबीच फरक फरक ब्याख्या भइरहेको छ । कट्टेल पक्षमा रहेकी संविधानसभा सदस्य उषा गुरुङले थेबेलाई सभापति पद दिइनुपर्छ भनेर कुनै भद्र सहमति नभएको जनाउँदै बरु उनलाई त्यसबेलै जनवर्गीय संगठन हेर्नेगरी विभागीय प्रमुख र प्रतिनिधिसभाको चुनावमा उम्मेद्वार बनाइएको बताउँदै आएकी छन् ।

थेबे जिताउ अभियानमा लागेका संविधानसभा सदस्य सुधिरकुमार शिवाकोटीले थेबेलाई उनको त्यसबेलाको त्यागको सम्मान गर्दै अर्को अधिवेशनमा सर्वसम्मत सभापति बनाउने भनेर भद्र सहमति भएको दावी दोहोर्याउँदै आएका छन् ।

त्यही सहमति अनुरुप पार्टीमा उपसभापति, सचिव, सहसचिव र कोषाध्यक्ष पदमा सर्वसम्मत चयन गरिएको जनाउँदै अहिले आएर भद्र सहमति तोड्नु राजनीतिक रुपमा बेइमानी हुने शिवाकोटीको आरोप छ ।

नौ बुँदे सहमतिमा विश्वप्रकाश शर्मा, डिल्ली सिटौला, सुधिरकुमार शिवाकोटी र गोपालकुमार बस्नेतको हस्ताक्षर रहेको थियो ।