मेचीनगर, ४ मंसिर । सत्य साई बाबाको ९६ औँ जन्म उत्सवको अवसर पारेर सत्य साई सेवा संगठनले ५ दिवशीय विभिन्न कार्यक्रम गरिरहेको छ । संगठनले शनिवार प्रदेश १ स्तरीय युवा कार्यक्रम सम्पन्न गरेको छ ।
मेचीनगर–१३ चारआली स्थित पाउँ पाथिभरा मन्दिरको परिसरमा आयोजित कार्यक्रममा प्रदेश–१ का २० वटा केन्द्र तथा भजन समूहका साईरामहरुको सहभागिता रहेको थियो ।
राष्ट्रिय सेवा विस्तार उपसंयोजक गोपाल खत्री, पूर्व प्रदेश अध्यक्ष केशव गुरागाँई र झापाको सबै भन्दा पुरानो केन्द्रकी संस्थापक अध्यक्ष मिरा प्रधानले दिप प्रज्वलन गरेर कार्यक्रमको उद्घाटन गरेका थिए । सो अवसरमा सहभागिहरुले भगवान साईरामको तस्विरमा पुष्प गुच्छा अर्पण गरेका थिए ।
कार्यक्रममा एकल तथा सामुहिक धार्मिक नृत्य, भजन, गायन, कविता बाचन लगायत रोचक प्रस्तुती रहेको थियो । कार्यक्रमको सुरुमा ११ जनाले आधा घण्टा सम्म बेदपाठ गरेका थिए । सो अवसरमा इष्ट होराइजनको बालविकासका विद्यार्थीहरुको गणेश नृत्यले कार्यक्रमलाई थप रोचक बनाएको थियो ।
शुक्रवारबाट विषयगत विभाग अन्तर्गत आ–आफ्नै केन्द्रमा कार्यक्रम सुरु गरिएको र यो अभियान ५ दिनसम्म चल्ने पूर्व प्रदेश अध्यक्ष केशव गुरागाँईले बताए ।
यो भगवानको उत्सवसँगै भक्त मिलन कार्यक्रम रहेको उनले बताए । भोलिदेखिका सवै कार्यक्रम स्थानिय केन्द्रहरुमै हुँने आयोजकले जनाएको छ ।
प्रदेश १ का अध्यक्ष साईराम कविन्द्र श्रेष्ठले स्वागत गरेको कार्यक्रमको सञ्चालन प्रदेश १ शिक्षा संयोजक विजय दंगाल, पुनम यादव र विजयता शर्माले संयुक्त रुपमा गरेका थिए ।
Discussion about this post