मेचीनगरमा आगलागी हुँदा एकको मृत्यु, १२ जना घाइते

ईटाभट्टा, २२ पुस । मेचीनगर–७ स्थित पिपलचोकको केशब पाठकको घरमा आगलागी हुँदा एक जनाको मृत्यु भएको छ भने १२ जना घाइते भएका छन् ।

मृत्यु हुनेमा मेनपा–८ का शरद राजवंशी रहेको इलाका प्रहरी कार्यालय काँकरभिट्टाका डीएसपी सुनिलसिंह दाहालले बताए ।
धुलाबारी स्थित एन्जल मेडिकल हल पुर्याउनासाथ राजवंशीको मृत्यु भएको प्रहरीले जनाएको छ ।

आगलागीमा ८ वर्षीया बालिका सुशीला अधिकारीसहित १२ जना घाइते भएका छन् । शुशीलाको ईटाभट्टा स्थित सिमरन मेडिकल हलमा उपचार भइरहेको छ । उनी मेचीनगर–८ निवासी हुन् ।

आगलागीमा घाइते हुनेहरुमा मेचीनगर–७ का ४० वर्षीय लेखनाथ तिम्सिना, ३२ का दीपेन्द्र कार्की, ३८ का चन्दन गौतम, ४० का सुभलाल राजवंशी, ३५ का विनोद गिरी, २८ का सन्देश बोहरा, ४० का भवानीशंकर न्यौपाने, ३४ का निर्मल शर्मा र वर्ष ३५ का नवराज श्रेष्ठ र मेचीनगर–८ का ३४ वर्षीय हरि विक छन् ।

त्यस्तै बिर्तामोड नगरपालिका–९ का २९ वर्षीय गोविन्द राजवंशी पनि घाइते छन् । घाइते सबैको बिर्तामोड स्थित बीएण्डसी अस्पताल उपचार भइरहेको जिल्ला प्रहरी कार्यालय झापाले जनाएको छ ।

बुधबार राति साढे ९ बजेतिर केशव पाठकको घरमा भाडामा बस्ने कुमार पाण्डेको कोठामा अचानक आगलागी भएको थियोे ।
घाइतेमध्ये केहीको अवस्था गम्भीर छ । टिनको छानो र चित्राले बेरेको घरमा आगलागी हुँदा दुई वटा ग्यासका सिलिन्डर पनि विष्फोट भएको थियो ।

प्रहरीले पनि सिलिन्डर विष्फोट भएको अनुमान गरेको छ । आगलागीको कारण खुल्न नसकेको प्रहरीले जनाएको छ ।