झापा, २४ चैत । चर्चित आध्यात्मिक साधक एवम् मनोक्रान्ति अभियानका प्रवर्तक डा.योगी विकासानन्द आगामी वैशाख २२ गते झापा आएर प्रवचन दिने भएका छन् ।
बिर्तामोड स्थित डोमालाल रंगशालामा उनले हजारौं सहभागी सामू ध्यान, तपस्या, हिप्नोसिस र मनोक्रान्ति बारेमा प्रवचन दिने कार्यक्रमको आयोजक विकासानन्द फाउन्डेसन विश्व परिवार झापाले जनाएको छ ।
आज फाउन्डेसनले बिर्तामोडको ड्रिमलेन्ड पार्कमा पत्रकार सम्मेलनमार्फत उक्त जानकारी दिएको हो । उनको प्रवचन सुन्नका लागि बीसौं हजारको संख्यामा शिक्षक, विद्यार्थी, कर्मचारी, व्यापारी, प्रहरी, स्काउट, डाक्टर, नर्स, जनप्रतिनिधि, पत्रकार लगायतलाई निमन्त्रणा गरिएको आयोजक संस्थाका झापा सचिव बिजय बरालले बताए ।
कार्यक्रममा योगी विकासानन्दलाई नागरिक अभिनन्दन र चार जना विभिन्न प्रतिभालाई सम्मान गरिने समेत बरालले जानकारी दिए । पूर्वी नेपालका इलाम, पाँचथर, ताप्लेजुङ, मोरङ, सुनसरीका साथै भारत र भूटानबाट समेत शुभचिन्तकहरु कार्यक्रममा सहभागी हुन आउने समितिकी संयोजक मेहर मगरले बताइन् ।
मनोक्रान्तिका अभियन्ता विकासानन्दको झापाको यो कार्यक्रम ऐतिहासिक रुपमा सफल हुने मनोक्रान्तिका अभियन्ता गजेन्द्र नेम्वाङको भनाई छ ।
कार्यक्रममा सहभागी हुन वैशाख २१ गते विकासानन्द झापा आउने र वैशाख २३ गते काठमाडौँ फर्किने बताइएको छ । पत्रकार सम्मेलनमा समितिका सल्लाहकार जयनारायण ढुंगानाले कार्यक्रम सफलताको शुभकामना व्यक्त गरेका थिए ।
कार्यक्रम सूर्योदय टेलिभिजनबाट प्रत्यक्ष प्रशारण हुने बताइएको छ । समितिले सहकारी अभियन्ता महेन्द्रकुमार गिरी, सामाजिक अयिभन्ता गजेन्द्र पौडेल, समाजसेवी जलकुमार गुरुङ, रञ्जु प्याकुरेल लगायतलाई सल्लाहकार चयन गरेको छ ।
कार्यक्रमको उद्घाटन उपसभामुख इन्दिरा राना मगरले राष्ट्रिय झण्डा फहराएर गर्ने बताइएको छ ।
Discussion about this post