मेचीनगर, ७ असार । ‘आर्थिक विकासमा सहकारीको महत्व’ विषयक मेचीनगर स्तरीय सामुदायिक विद्यालय अन्तर मावि वक्तृत्वकला प्रतियोगितामा मेचीनगर–१२ स्थित सरस्वती बालकल्याण माविकी युना गौतम प्रथम भएकी छन् ।
आज धुलाबारी स्थित मेची उद्योग बाणिज्य संघको सभाहलमा पूर्वीद्वार बचत तथा ऋण सहकारी संस्थाको १७ औँ स्थापना दिवसको अवसरमा मेचीनगर स्तरीय सामुदायिक विद्यालय अन्तर मावि वक्तृत्वकला प्रतियोगिता आयोजना गरिएको हो ।
प्रतियोगितामा सरस्वती बालकल्याण माविकी युना गौतम प्रथम, मेचीनगर–८ स्थित आदर्श माविकी शिक्षा बाँस्तोला दोस्रो, मेचीनगर–५ स्थित बालकल्याण माविकी कुसुम लिम्बू तेस्रो र मेचीनगर–१० स्थित धुलाबारी माविका स्वर्णिम बराल चौथो स्थान हासिल गर्न सफल भएका थिए ।
उनीहरुलाई नगदसहित सम्मान पत्रद्वारा पुरस्कृत गरिएको थियो । प्रथम, दोस्रो, तेस्रो र चौथो हुनेलाई क्रमशः ५ हजार, ३ हजार, २ हजार र १ हजार प्रदान गरिएको थियो ।
प्रतियोगिताको निर्णायकको संयोजकमा धर्मनन्द खनाल तथा सदस्यहरुमा निरोज कट्टेल र दामोदर ढुंगेल थिए । कार्यक्रममा संस्थालाई योगदान गर्ने शेयर सदस्य र सञ्चालक समिति सदस्यहरुलाई सम्मान समेत गरिएको थियो ।
प्रतियोगिताका विजेताहरुलाई कार्यक्रमका प्रमुख अतिथि मेचीनगर नगरपालिका मेयर गोपालचन्द्र बुढाथोकीले पुरस्कारसहित प्रमाणपत्र वितरण गरेका थिए । उनले सहकारीहरुले मौसमी खेती सञ्चालन गरेर किसानहरुलाई उत्पेरित गर्नु पर्ने धारणा राखेका थिए ।
धुलाबारीमा प्रधान कार्यालय रहेको संस्थाको मेचीनगरमा मुख्य कार्यालयसहित ८ वटा सेवा कार्यालयहरु रहेका छन् । २०६३ असार ७ गते ३३ जना शेयर सदस्यबाट उठाएको ३३०० रुपैयाँको पुँजीले आज १७ वर्ष पुग्दा दुई करोड ६५ लाख शेयर पुँजी छ भने ६ हजार ४८ जना शेयर सदस्य रहेको संस्थाले जनाएको छ ।
पूर्वीद्वार साकोसका अध्यक्ष विश्वेश्वरप्रसाद भट्टराई (विपी)को अध्यक्षतामा सम्पन्न कार्यक्रमको स्वागत उपाध्यक्ष मणिराम खतिवडाले गरेका थिए । कार्यक्रमको अौचित्यमाथि कार्यक्रम संयोजक निरोज कट्टेलले प्रकाश पारेका थिए । कार्यक्रमको सञ्चालन व्यवस्थापक प्रल्हाद खड्काले गरेका थिए ।
Discussion about this post