झापा, २७ साउन । अखिल नेपाल यातायात मजदुर निजी विद्यालय चालक संघ झापाले हक, अधिकार स्थापित गर्न अन्तरक्रिया गरेको छ ।
संघले यसअघि निजी विद्यालयका चालक र सहचालकका विषयमा भएका सम्झौता कार्यान्वयन गर्न पहल तथा थप सेवासुविधा सुरक्षित गर्न आज बिर्तामोडमा अन्तरक्रिया गरेको हो ।
संघका झापा अध्यक्ष पदमलाल तामाङको अध्यक्षतामा भएको अन्तरक्रिया कार्यक्रममा अखिल नेपाल ट्रेड युनियन महासंघका केन्द्रीय उपाध्यक्ष भूपाल सापकोटाको प्रमुख आतिथ्य रहेको थियो ।
अन्तरक्रिया कार्यक्रमलाई सम्बोधन गर्दै प्रमुख अतिथि सापकोटाले राजनीतिक आस्था जुनसुकै पार्टीमा भएपनि मजदुरका पेशागत हक, अधिकारका लागि टे«ड युनियन महासंघले साथ र सहयोग गर्ने बताए ।
‘आन्दोलन गर्ने कसैको रहर हुँदैन’, उपाध्यक्ष सापकोटाले भने –‘माग्दा आफ्नो हक, अधिकार पाइदैन भने त्यसका लागि आन्दोलन गर्नुपर्छ ।’
उनले शिक्षा र स्वास्थ्यका क्षेत्रमा राम्रो ब्यापार भएको बताउँदै कर्मचारीलाई सेवा सुविधा नदिए आफ्ना हक, अधिकार सुरक्षित गर्नका लागि सवै एकताबद्ध हुनुपर्ने बताए । सापकोटाले सामाजिक सुरक्षा ऐनले गरेको ब्यवस्थामा सवैलाई जोडिन आग्रह समेत गरे ।
सापकोटाले यदि कसैले आफ्नो हक, अधिकारका लागि संगठन र आन्दोलन गर्दा जागिरबाट निस्काशन गरे त्यसको प्रतिकार टे«ड युनियन महासंघले गर्ने प्रतिबद्धता समेत ब्यक्त गरे ।
अखिल नेपाल ट्रेड युनियन महासंघकी केन्द्रिय उपमहासचिव तथा कार्यक्रमकी विशिष्ठ अतिथि सीता सापकोटाले निजी विद्यालयका चालक र सहचालकलाई विद्यालयले समयअनुकूल सेवासुविधा दिन सक्दैन भने विद्यालय बन्द गर्नुपर्ने बताइन् ।
उनले आफ्नो हकहितका लागि सांगठानिक एकता आवश्यक रहेकाले सवैलाई एकताबद्ध भएर अघि बढ्न आग्रह समेत गरिन् ।
कार्यक्रममा अखिल नेपाल यातायात मजदुर संघका केन्द्रीय उपसचिव हरि निरौला, अखिल नेपाल यातायात मजदुर संघका केन्द्रीय सदस्य जानकीप्रसाद भट्टराई लगायतले बोलेका थिए ।
अन्तरक्रिया कार्यक्रममा निजी विद्यालयका चालकहरुले आ–आफ्ना समस्या समेत राखेका थिए भने जिल्लाभरका चालक र सहचालकको बाक्लो उपस्थिति रहेको थियो ।
संघका झापा अध्यक्ष पदमलाल तामाङले चालक र सहचालकलाई संगठित हुन पत्र नै दिएकाले सवैले संगठित भएर आफ्ना हक, अधिकार सुरक्षित गर्न सवैलाई आग्रह गरे ।
संघका कोषाध्यक्ष सूर्य लिम्बुले स्वागत गरेको कार्यक्रमको सञ्चालन सचिव इन्द्र योङहाङले गरेका थिए ।
Discussion about this post