पर्यटन प्रवर्द्धनमा जुट्दै मेचीनगरका सामुदायिक वनहरु

मेचीनगर, १ फागुन । मेचीनगरमा पर्यटन प्रवर्द्धन गर्न सामुदायिक वनका उपभोक्ता समूहहरु दिलो ज्यान दिएर लागि परेका छन् ।

पछिल्लो समय वनका उपभोक्ताहरु पर्यटन प्रवर्द्धन गर्न देशकै नमूना सिमसार क्षेत्रको रुपमा विकास गर्न लागिपरेका हुन् ।

मेचीनगर–१३ को हातेमालो सामुदायिक वन उपभोक्ता समूहले पर्यटन प्रवर्द्धन गर्न सिमसार क्षेत्रको दायरा फराकिलो पारेको छ ।

जर्वा पानीको भेललाई ब्यवस्थापनसहित संरचनागत विकास निर्माणको कार्ययोजनाअघि बढाउँदै वन समूहले निचाझोडा सिमसार तथा पर्या–पर्यटन क्षेत्रको रुपमा तिव्र विकास गर्दै लगेको छ ।

प्राकृतिक वन सम्पदाकोबीच भागमा प्रयोग नभएको पानी उम्रिने झिलझ जमिनलाई वन समूहले पर्यटकको आकर्षक गन्तव्यस्थलको रुपमा विकास गर्दै देशकै नमूना सिमसारको कार्ययोजना अघि सारेको वन समुहका अध्यक्ष चन्द्र सिग्देलले बताए ।

समुहले निचाझोडा सिमसार तथा पर्या–पर्यटन क्षेत्रको विकासका लागिबीच भागमा टापु र त्यस वरिपरि फेवातालको दुरदृष्टी परिकल्पनासहित विकासका कार्ययोजना सुरु गरेको छ । हाल उक्त फेवातालबाट आन्तरिक तथा बाह्यय पर्यटकले ६ वटा डुंगामा यात्रा–अवलोकन गर्दा आम्दानी समेत हुन थालको छ ।

चालुआर्थिक वर्षमा १ लाख माछा पाल्न सुरु गरेको छ । फेवातालमा पालेको माछा बिक्री गर्न (फिसिङ) बल्छी गरेर माछा मार्ने अर्को छुट्टै योजना रहेको अध्यक्ष सिग्देलको भनाई छ । आगन्तुकको माग अनुसार अरु १० वटा डुंगा थप गर्ने सोच रहेको छ ।

हाल वरिपरी फेवातालको बीचमा रहेको खुल्ला ठाउँमा ६ वटा गोलघर निर्माण गरेको छ । प्रत्यक शनिबार र छुट्टिको दिन दर्जनौं पर्यटकहरु आउने गर्छन् । यहाँ पर्यटकले सेमिनार, पार्टी, वनभोज गर्दै आएका छन् । २० वटा गोलघर थपेर एकसय भन्दा बढी मानिस अट्ने गरी पार्टी, वनभोज र कार्यक्रम गर्ने तयारी भइरहेको छ ।

स्थानीय निकाय र वन समूहको करिब अढाई करोड बजेटमा फेवातालको उत्खनन–ब्यवस्थापन, २ वटा आकर्षक पुल–पुलेसा निर्माण, बिजुली, खानेपानीको ब्यवस्थापन, गोलाघर निर्माण,६ वटा डुंगा खरिद, गेटसहित सुरक्षा प्रदान गर्न २० फुटे अग्लो घर निर्माण, तारजाली कम्पाउण्ड, बाटो निर्माण र ग्राबलिङ गरेको छ ।

वडा कार्यालयले पटक–पटक गरेर २७ लाख, मेचीनगर नगरपालीबाट फलामे पुलसहित १५ लाख बजेट बिनियोजन गरेको छ भने अन्य बजेट वनको आन्तरिक श्रोतबाट ब्यवस्थापन गरेको छ । वनले आन्तरिक श्रोतबाट ६ वटा गोलघर निर्माण समेत गरेको छ ।

प्रदेश सरकारको आगामी बजेटबाट २५ लाखले पानीको फोहोरा, जलाधार निर्माण र चिल्ड्रेन पार्क निर्माण गर्ने, ३ वर्षे क्रमागत २२ लाख बजेटबाट सिमसारको उत्तरपट्टी र पश्चिममा पोखरी निर्माण गर्ने तयारी रहेको छ । स्थानीय निकाय, जिल्ला बनसँग समन्वय गरेर भविश्यमा मिनी–जु को ब्यवस्थापन गर्ने योजना रहेको छ ।

वनको ३९० हेक्टरमध्ये ३२ बिगाह खाली जमिनमा फैलिएको सिमसार खुल्ला र घमाइँलो ठाउँ दैनिक जीवनयापनलाई सहज बनाउन प्रयोग गरिएका ढिक्की, जातो, ठेकी लगायत लोपबस्तु संरक्षण गर्ने, मनोरञ्जनका लागि काठको रोटेपिङ्ग निर्माण गर्ने, स्थानीय संस्कृतिलाई जगेर्ना गर्न विभिन्न सम्प्रदायका मठमन्दिर गुम्बा एवम् धार्मिक संरचनाको निर्माण गर्ने साथै एग्रो टुरिजमको रुपमा विकास गर्ने भावी योजना रहेको अध्यक्ष सिग्देलको भनाई छ ।

झापाका ५९ वटा सामुदायिक वनमध्ये ३५ वटा भन्दा बढी वनले पर्या–पर्यटन क्षेत्रको रुपमा विकास गरिरहेको डिभिजन वन कार्यालय झापाका प्रमुख ऋषि पराजुलीले जानकारी दिए ।

उनले झापाका सामुदायिक वनहरुले नियम अनुसार नै पर्या–पर्यटन क्षेत्रको रुपमा विकास गर्दै लगेको बताए ।
मेचीनगरका सामुदायिक वनहरु पर्या–पर्यटन क्षेत्रको विकास गर्न होडबाजी नै चलिरहेको छ ।

हातेमालो, प्रगति, बाँसबारी, कालिका, थोप्लेविरान, पाँचपोखरी लगायतका सामुदायिक वनहरु पर्यटन प्रवर्द्धनका लागि सिमसार क्षेत्रको विकासमा कार्ययोजना बनाएर अघि बढिरहेका छन् ।

त्यस्तै धार्मिक तथा पर्यटन क्षेत्रको विकास गर्न कृष्ण थुम्की, पाताल गंगा लगायतका मठमन्दिरहरुका समितिहरु लागि परिरहेका छन् ।