काँकरभिट्टा, १९ फागुन । सुसेली साहित्यिक परिवारले एक संस्था र एक उद्यमीलाई पुरस्कृत गरेको छ ।
शनिबार सुसेली परिवारको काँकरभिट्टा खानेपानी कार्यालयको सभाहलमा झापाली महिला पत्रकारको छाता संस्था नारी सञ्चार गृहलाई १८ हजार नगद राशीको स्व.वेदकुमारी रेग्मी कर्मठ महिला पुरस्कृत गरेको छ ।
त्यस्तै मेचीनगर–१२ की उद्यमी निर्मला चौहान भण्डारीलाई १५ हजार नगद राशीको डा. मुकेशकुमार–जनककुमारी चालिसे विज्ञान पुरस्कार प्रदान गरिएको हो ।
कार्यक्रमकी प्रमुख अतिथि मकालु टेलिभिजनकी सञ्चालक गंगा सुवेदीले दुबै पुरस्कार प्रदान गरेकी थिइन् । नारी सञ्चार गृहलाई दिइएको पुरस्कार अध्यक्ष रेजिना गौतमले ग्रहण गरिन् ।
सो अवसरमा पूर्व न्यायाधीश शारदा कोइरालाको ठिक÷बेठिक नामक कथा संग्रह र सुसेली साहित्यिक परिवारको २१ औं विशेषांक (वेदकुमारी श्रद्धाञ्जली अंक) को लोकार्पण समेत गरिएको थियो ।
विमोचित कथा कृतिको गंगा अधिकारी र सुसेली विशेषांकका बारेमा दामोदर ढुंगेलले समीक्षा गरेका थिए ।
सुसेली परिवारका अध्यक्ष पुण्यप्रसाद खरेलको अध्यक्षतामा सम्पन्न कार्यक्रमको स्वागत उपाध्यक्ष केन्द्रप्रसाद भट्टराईले र सञ्चालन सचिव कनक कार्कीले गरेका थिए ।
Discussion about this post