भारतीय तरकारी रोक्न मेची उद्योग बाणिज्य संघको आग्रह

मेचीनगर, ५ बैशाख । भारतबाट आयातीत तरकारीका कारण नेपालमा उत्पादित वस्तुले बजार नपाएकोमा किसानहरु चिन्तित बनेका छन् ।

मेची उद्योग बाणिज्य संघका अध्यक्ष खेमराज प्रसाईको नेतृत्वको टोलीले साेमबार मेची भन्सार कार्यालय, क्वारेन्टिन कार्यालय, खाद्य आयात निर्यात गुणस्तर प्रमाणीकरण कार्यालयमा गएर भारतबाट आयात हुने अखाद्य तरकारीहरु रोक्न ध्यानाकर्षण गराएका छन् ।

अध्यक्ष प्रसाईको नेतृत्वको टोलीले मेची भन्सार कार्यालयका प्रमुख रामप्रसाद रेग्मी, खाद्य आयात निर्यात गुणस्तर प्रमाणीकरण कार्यालयका प्राविधिक सहायक दिनेश ढुंगाना र क्वारेन्टिन कार्यालयका बरिष्ठ बाली संरक्षण अधिकृत हर्षहाङ राईलाई भेटेर भारतबाट आयात हुने अखाद्य तरकारीहरु ल्यावमा टेष्ट गरेर खान योग्य भएमात्र छाड्न आग्रह गरेका थिए ।

पछिल्ला केही दिनयता भारतबाट तरकारी आयात हुने क्रम बढेपछि नेपाली किसानले उत्पादन गरेको तरकारीले बजार र मूल्य पाउन सकेका छैनन् ।

यसअघि भारतबाट आयातित तरकारीले गर्दा नेपालमा उत्पादित तरकारीले मूल्य नपाएकोमा किसानले सडकमा तरकारी फ्याँकेर सांकेतिक विरोध गरेका थिए । नेपालमा उत्पादन भएको तरकारीको तुलनामा भारतबाट भित्रिएको तरकारी सस्तो छ ।

टोलीमा आएका किसान हरि नेपालले आफ्नो बारीमा उत्पादन भएका तरकारीहरुले बजार नपाएपछि गाईवस्तुलाई दिने अवस्था आएको बताए । उनका अनुसार भारतीय तरकारीले गर्दा वैगुन ५ रुपैयाँ केजीले बेच्नु पर्ने भएको छ ।

अध्यक्ष प्रसाईले खाद्य आयात निर्यात गुणस्तर प्रमाणीकरण कार्यालयका प्राविधिक सहायक ढुंगानालाई भारतबाट आउने अखाद्य तरकारीहरु रोक्न ध्यानाकर्षण पत्रसमेत बुझाएका छन् ।

ध्यानाकर्षण पत्र बुझ्दै ढुंगानाले चालुआर्थिक वर्षमा भारतबाट आएका तरकारी तथा फलफुलहरु परीक्षण गर्दा खान अयोग्य फेला नपरेको बताए । उनका अनुसार गतवर्ष भने त्यस्तो भेटिएको दावी गरे ।

क्वारेन्टिन कार्यालयका बरिष्ठ बाली संरक्षण अधिकृत राईले भारतीय तरकारीलाई कानून अनुसार प्रक्रिया पुरा गरेर छाड्ने गरेको जानकारी गराए ।

‘खाद्य आयात निर्यात गुणस्तर प्रमाणीकरण र क्वारेन्टिन कार्यालयबाट परीक्षण भएर आएका तरकारी तथा फलफुल मात्र छाड्ने गरेका छौँ’, भन्सार प्रमुख रेग्मीले भने–‘कोहि त यस्ता पनि व्यापारी आए तराकारीको गाडी पानीट्याङ्कीमा कागज यहाँ परीक्षण गरेर पास भइसकेको थियो । वस्तु र कागज हेरेर कम्युटरमा थिचिसकेपछि मात्र गाडी पास हुन्छ ।’

ध्यानाकर्षण पत्र बुझाउने टोलीमा अध्यक्ष प्रसाई, महासचिव दिनेश शाक्य, सदस्यहरु मानबहादुर कटुवाल, सन्तोष खवास, कार्यकारी निर्देशक गोपाल वस्नेत, हरि नेपाल लगायतको उपस्थिति रहेको थियो ।