मेचीमा गिरेको साखलाई जोगाउँछु : अग्नी अधिकारी

मेचीनगर, १४ बैशाख । मेचीनगर नगरपालिकाका प्रमुख प्रशासकीय अधिकृत अग्नीप्रसाद अधिकारीले मेचीमा गिरेको साखलाई राष्ट्रियस्तरसम्म पुर्याएर सकरात्मक सन्देश प्रवाह गर्ने बताएका छन् ।

आज दिउँसो प्रेस क्लब मेचीनगरले आयोजना गरेको सञ्चारमा भएका समस्याको समाधान र प्रमुख प्रशासकीय अधिकृत अग्नीप्रसाद अधिकारीलाई स्वागतसहितको अन्तरक्रिया कार्यक्रममा उनले यस्तो कुरा बताएका हुन् ।

‘स्थानीय सरकारको साझेदारको रुपमा मिडिया पनि एउटा अंग हो’, अधिकारीले भने–‘मेचीनगरमा जटिल्ताहरु धेरै छन् । त्यो सबैलाई थाहा भएकै कुरा हो । त्यसलाई चिर्दै नयाँ मोडमा ल्याउन छ । सिस्टममा हिडाउन सबैको साथ र सहयोगको आवश्यक छ ।’

उनका अनुसार जनप्रतिनिधि, दलहरु, कर्मचारी र नागरिकहरुसँगको सम्बन्ध र सीमालाई व्यवस्थित गरेर लान जरुरी छ ।

उनले भने–‘मलाई यो नगरमा असफल हुने छुट छैन । सबैलाई निरनकुश हुनबाट जोगाउँ । मेचीनगरमा गिरेको साखलाई नेशनल लेवलमा पोजेटिभ भाइव प्रवाह गर्नु पर्ने छ ।’

अन्तरक्रिया कार्यक्रममा पत्रकारहरु मोहन काजी, तारामणि सापकोटा, शिशिर चौलागाई, ज्ञानेन्द्र निरौला, डम्बर बराल, अम्बिका भण्डारी, अर्जुन कार्की, झुलन रेग्मी, जीआर धिताल, देबु बानियाँ, खगेन्द्र घिमिरे, प्रकाश उप्रेती, दिलिप थापा, भोला तिम्सिना, नवराज सुवेदी, विनिषा शर्माले सञ्चार क्षेत्रमा भएका समस्या र समाधानका विषयमा सुझावसहितको धारणा राखेका थिए ।

मेचीनगरमा लामो समयदेखि कर्मचारी, जनप्रतिनिधिबीचको सम्बन्ध सुमधुर नभएका कारण नगरवासीले सास्ती व्यहोर्नु परिरहेको छ ।

नगरपालिकामा आउने कुनै पनि प्रमुख प्रशासकीय अधिकृत धेरै समय टिक्दैनन् थिए । नगरपालिका मिडिया मैत्री नभएकोमा स्थानीय सञ्चारकर्मीहरु पनि रुष्ट थिए ।

यी सबै कुरालाई ध्यानमा राखेर अबका प्रमुख प्रशासकीय अधिकृतलाई नगरको विकास र मिडिया मैत्री हुन आग्रह समेत गरिएको छ ।

प्रेस क्लब मेचीनगरका अध्यक्ष डम्बर बरालको अध्यक्षतामा सम्पन्न कायक्रमको स्वागत उपाध्यक्ष जीआर धितालले र सञ्चालन सचिव देबु बानियाँले गरेका थिए ।