बिर्तामोड, १६ माघ । बिर्तामोडको गायत्री माता मन्दिरको पाँच दिवसीय अनुष्ठानको सम्पूर्ण तयारी पूरा भएको छ ।
यही माघ २१ गतेसम्म सञ्चालन हुने अनुष्ठानको बिहीवार विहान प्रतिनिधि सभाका सभामुख देवराज घिमिरेले कलशमा गंगाजल अर्पण गरेर निसान यात्राको सुरु गर्ने कार्यक्रम रहेको छ ।
बिर्तामोड–५ स्थित बालाजी मन्दिर परिसरमा आयोजित कार्यक्रमकाबीच सभामुख घिमिरेले बिहान ८ बजे कलशमा गंगाजल अर्पण गरेपछि शोभायात्रा प्रारम्भ हुने छ ।
पाँचसय भन्दा बढी भक्तजनको सहभागितामा बिर्तामोड नगर परिक्रमापछि गायत्री मन्दिर परिसरमा पुगेर कलशयात्रा बिर्सजन हुने कार्यक्रम संयोजक रौनक वंशलले जानकारी दिए ।
आचार्य आशुुतोष खनालको संयोजनमा २१ जना ब्राम्हण र एकसय जना बटुक अनुष्ठानमा सहभागी रहने छन् । नेपाल तथा भारतमा ख्यातिप्राप्त भजन गायकद्वारा दैनिक भजन कीर्तनको आयोजना गरिने र स्थानीय भजन कीर्तन मण्डलीले समेत पाँच दिनसम्म भजन कीर्तन गर्ने बताइएको छ ।
भजन कीर्तनका लागि कृष्ण भण्डारी, आयुष शर्मा, साहिल कोहली, धीरज सिंह राजपुत, नेहा सिंह राजपुत लगायत सहभागी हुने वंशलले जानकारी दिए ।
त्यस्तै अनुष्ठानमा सहभागीका लागि दैनिक महाप्रसाद बितरण गरिने मन्दिर निर्माण समितिले जनाएको छ । आगामी माघ २० गते नेपाल राष्ट्रका प्रथम ऐतिहासिक जगतगुरु अनन्त श्री विभूषित बालसन्त मोहनशरण देवाचार्य महाराजबाट विशेष प्रवचनको आयोजना गरिएको छ ।
आगामी माघ २१ गते विधि पूर्बक प्राण प्रतिष्ठा गरिने गायत्री मन्दिर सेवा समितिका वंशलको भनाई छ । माताको प्राण प्रतिष्ठा कोशी प्रदेश सरकारका मुख्यमन्त्री हिक्मत कार्कीले गर्ने कार्यक्रम तय भएको छ । दाता परिवारहरु, बिर्तामोड नगरपालिका र कोशी प्रदेश सरकारको संयुक्त लगानीमा गायत्री माताको मन्दिर निर्माण गरिएको हो ।
मन्दिर परिसरमा निःशुल्क स्वास्थ्य शिविरको समेत आयोजना गरिएको छ । जसका लागि स्पाइन एक्स हस्पिटल प्रालिले निःशुल्क स्वास्थ्य जाँचको व्यवस्था मिलाएको छ ।
अढाई करोड लगानीमा माताको मन्दिर निर्माण सम्पन्नसँगै मन्दिर उद्घाटन गर्नु पूर्व मन्दिरको सजावट, शनिश्चिरे रोड सरसफाईदेखि अनुष्ठान परिसर नजिकै घुम्ती सौचालय लगायतका निर्माणको काम सम्पन्न भएको छ ।
Discussion about this post