मेचीनगर, १३ मंसिर । नेकपा एमालेको ११ औं राष्ट्रिय महाधिवेशनका लागि झापा क्षेत्र–१ बाट ६ जना प्रतिनिधि निर्वाचित भएका छन् ।
शनिबार सम्पन्न निर्वाचनमा झापा क्षेत्र–१ मा ६ जना प्रतिनिधिका लागि ११ जना उम्मेदवार मैदानमा उत्रिएका थिए ।
खुल्लातर्फ लक्ष्मीकुमार राईले ८२८ मत, असारु राजवंशीले ८९२ मत र खेमराज पोखरेल (राजु) ले ९६५ मत, महिलातर्फ रमा भण्डारी ढकालले ११०५ मत र जानुका देवी ओलीले ९३६ मत, युवातर्फ दीपक बरालले ८३३ मत ल्याएर निर्वाचित भएका छन् ।
११ जनामा अन्य प्रतिस्प्रर्धीहरु जगन भट्टराईले ३०९ मत, गोविन्द गिरीले ४०० मत, हर्कबहादुर वस्नेतले ३५४ मत, प्रीतम काफ्लेले ५०९ मत र दुर्गा (रेनुका) डाँगीले ५२३ मत मात्र प्राप्त गरेका थिए ।
नेकपा एमाले झापा क्षेत्र नं.१ को चुनाव विहान १० वजेदेखि दिउँसो २ वजेसम्म चार वटा ठाउँमा भएको थियो । जम्मा २६३५ मतदाता मध्ये १४५५ जनाले मतदान गरेका थिए ।
झापा–१ अन्तरगत १, २, ३ र ४ नम्बर वडाको मेचीनगर–२ भृकुटी बजारमा भएको चुनावमा ४८२ मतदातामा २७८ मत खसेको थियो । वडा नम्बर ५, ६, ७ र ८ को मेचीनगर–६ स्थित एमाले क्षेत्रीय पार्टी कार्यालय काँकरभिट्टामा भएको चुनावमा ५५१ मा ३०४ मत खस्यो ।
वडा नम्बर ९, १० र १५ को मेचीनगर–१० स्थित मेची उद्योग बाणिज्य संघको सभाहलमा भएको चुनावमा ३८८ मा २३६ मत खसेको थियो ।
यस्तै वडा नम्बर ११, १२, १३ र १४ को मेचीनगर–१२ स्थित जालपा सामुदायिक भवनमा भएको चुनावमा ६५२ मतमध्ये ३०१ मत खस्यो । वडा नम्बर ९ र १० को भद्रपुर–९ मा रहेको मुना भवनमा भएको चुनावमा १७८ मा १६१ मत खसेको थियो ।
यता बुद्धशान्ति वडा नम्बर ४, ५, ६ र ७ को बुद्धशान्ति–४ टिमाई स्थित भुटानी शिविरमा भएको चुनावमा ३८४ मतदातामा १७५ जनाले मतदान गरेका थिए ।
Discussion about this post